Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Regionlarda maarifləndirmə tədbirləri keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, İsmayıllı, Qəbələ, Göygöl, Zərdab Uşaq və Ailələrə Dəstək Mərkəzləri tərəfindən bölgələrdə tibb müəssisələrindən kənarda baş verən doğuş faktlarına nəzarətin gücləndirilməsi və erkən evliliklərdə bu halların qarşısının alınması istiqamətində maarifləndirici görüşlər keçirilib. Kənd və qəsəbələrdə keçirilən maarifləndirmə tədbirlərində mərkəzlərin, rayon idarə, müəssisə və təşkilatların, kənd icra nümayəndəliyinin və bələdiyyələrin əməkdaşları, tibb işçiləri, ziyalılar, din xadimləri, mərkəzlərin ekspertləri və icmalardan olan sakinlər, o cümlədən ağsaqqal və ağbirçəklər iştirak ediblər. Ekspertlər tərəfindən uşaq evliliklərinin qarşısının alınması üçün mövcud vəziyyət təhlil edilib, tibb müəssisələrindən kənarda baş verən doğuşların fəsadlarından və erkən nikah hallarının, qızların təhsildən yayındırılmasının qarşısının alınması istiqamətində valideynlərlə mütəmadi olaraq maarifləndirici işlərin aparılması ilə bağlı təkliflər dinlənilib. Sonda iştirakçıları maraqlandıran suallar cavablandırılıb.
Regionlarda “Mənim hüquqlarım” adlı təşviqat avtobusu layihəsi çərçivəsində uşaqlarla görüşlər davam edir
Ailə, Qadın və Uşaq Problemləri üzrə Dövlət Komitəsi tərəfindən regionlarda yaşayan uşaqların asudə vaxtının səmərəli təşkili və öz maraqlarına toxunan mövzularda maarifləndirilməsi məqsədilə həyata keçirilən “Mənim hüquqlarım” adlı təşviqat avtobusu layihəsi çərçivəsində növbəti səfər Daşkəsən rayonuna təşkil olunub. 11-13 iyun 2024-cü il tarixlərində Daşkəsən Rayon İcra Hakimiyyətinin dəstəyi ilə Bayan, Quşçu, Xoşbulaq, Qabaqtəpə kəndlərində və Daşkəsən qəsəbəsində ümumilikdə 125 uşağın iştirakı ilə “Uşaq hüquqları”, eyni zamanda “İnternet təhlükəsizliyi” mövzularında təlimlər keçirilib. Dövlət Komitəsinin əməkdaşı və “Azərbaycan Uşaqlarının İnkişaf Platforması” İctimai Birliyinin təlimçiləri tərəfindən müxtəlif qrup işləri, interaktiv oyunlar təşkil olunub, müzakirələr aparılıb. Təlimlərin sonunda uşaqlara “Uşaq hüquqları”,“İnternetdən təhlükəsiz istifadə üçün maariflənək” adlı maarifləndirici çap materialları və yapışqanlı stikerlər paylanılıb, həmçinin bədii kitablar hədiyyə edilib.
Dövlət Komitəsi vakansiya elan edir
Azərbaycan Respublikasının Ailə, Qadın və Uşaq Problemləri üzrə Dövlət Komitəsi tabeliyində olan Qəbələ, Goranboy, İsmayıllı Uşaq və Ailələrə Dəstək Mərkəzlərində (UADM) aşağıdakı vakant vəzifələr üzrə işə qəbul müsabiqəsi elan edir. 1) Baş mühasib-Qəbələ UADM 2) Psixoloq-Goranboy UADM 3) Fiziki tərbiyə rəhbəri (təlimatçı)-İsmayıllı UADM Vəzifələr barədə ətraflı aşağıdakı linkdən tanış ola bilərsiniz. Vəzifə təlimatları Qeyd edilən vəzifə üzrə işə qəbul olmaq istəyən şəxslər 20 iyun – 19 iyul 2024-cü il tarixlərində şəxsi məlumatlar anketini (CV) region@family.gov.az elektron poçt ünvanına göndərə bilərlər. Yalnız tələblərə cavab verən namizədlərlə əlaqə saxlanılacaq və müsahibəyə dəvət olunacaqlar. Müsahibə nəticələrinə uyğun olaraq, seçilmiş şəxsə bu barədə məlumat veriləcək. Qeyd: Baş mühasib vəzifəsinə namizədlər müvafiq peşəkar mühasib sertifikatına malik olmalıdır. Əlaqə: Ailə məsələləri şöbəsi Mərkəzlərlə iş sektoru şəh. (+99412) 493-79-62 mob. (+99451) 230-54-87
“Ailə terapiyası” mövzusunda təlim keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə Mingəçevir şəhərində uşaq hüquqlarının müdafiəsi üzrə ayrı-ayrı sahələrdə mütəxəssis hazırlığının təmin edilməsi məqsədilə Uşaq və Ailələrə Dəstək Mərkəzlərinin əməkdaşları, həmçinin Mingəçevir şəhər ümumtəhsil müəssisələrinin psixoloqları üçün “Ailə terapiyası” mövzusunda təlim keçirilib. Tədbirdə açılış nitqi ilə çıxış edən Komitə əməkdaşı Zülfiyyə Sadıq iştirakçılara kadr potesialının artırılması yönümündə görülən işlər haqqında məlumat verərək, bu təlimin ailə ilə işləyən psixoloqların peşəkarlığının artırılmasına mühüm töhfə verəcəyini bildirib. Daha sonra təlimçi ekspert Aynur Bünyatova ailə sisteminin əsas qanunları, ailə münasibətlərinin qiymətləndirilməsi, texnika və strategiyalar, ailə sistemi dinamikasının dəyişmək üçün tətbiq olunan üsul və metodlar, ailə terapiyasında etik prinsiplər və peşəkar standartlar barədə geniş məlumat verib. Təlim zamanı iştirakçılarla rollu oyunlar vasitəsilə psixoloqun ailə fərdləri ilə apardığı konsultasiyanın strukturunu və məzmunu simulyasiya edilib, konsultasiya zamanı edilən səhvlərlə bağlı ekspertin tövsiyələri dinlənilib. Sonda təlim iştirakçılarına sertifikatlar təqdim olunmuşdur.
“Qaynar xəttin əsas iş prinsipləri” mövzusunda təlim keçirilib
Respublikanın işğaldan azad olunmuş ərazilərinə geri qayıdan əhaliyə dəstək göstərilməsi, onların adaptasiyasının daha səmərəli həyata keçirilməsi üçün müvafiq dövlət orqanları əməkdaşları üçün Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Qaynar xəttin əsas iş prinsipləri” mövzusunda təlim keçirilib. 11-13 iyun 2024-cü il tarixində keçirilən təlimdə təlimdə Komitənin Ailə məsələləri şöbəsinin müdir müavini Kamila Əliyevə və Mərkəzlərlə iş sektorunun müdiri Pərviz Əliyev işğaldan azad olunmuş ərazilərdə həyata keçirilən Böyük Qayıdış Dövlət Proqramı çərçivəsində görülən işlər barədə məlumat veriblər. Qeyd edilib ki, həmin ərazidə yaşayan əhalinin adaptasiyasına peşəkar və həssas yanaşma önəmlidir və bu sahədə dövlət qurumlarında çalışan əməkdaşların üzərinə böyük məsuliyyət düşür. Üç gün davam edən təlimə Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyi, Qarabağ və Şərqi Zəngəzur Regional Təhsil İdarələri, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi, Dayanıqlı və Operativ Sosial Təminat Agentliyi, Dövlət Məşğulluq Agentliyi, Füzuli, Laçın, Zəngilan, Xocalı, Cəbrayıl rayon və Şuşa şəhər icra hakimiyyətləri, Şuşa şəhəri Dövlət Qoruğu İdarəsinin əməkdaşları cəlb olunub. Təlimçilər “Ümidli Gələcək” Sosial Təşəbbüslər İctimai Birliyinin (İB) sədri Kəmalə Aşumova, İB-in Sosial xidmət mərkəzinin psixoloqu, təlimçi Fidan Əkbərli və Yuvenal Ədliyyə Mərkəzinin əməkdaşı, klinik psixoloq Gülşən Axundova tərəfindən geri qayıdan əhalinin psixologiyası, yeni şəraitə adaptasiyası, əhaliyə dəstək məqsədilə kadrların peşəkar bacarıqlarının artırılması, psixoloji stressin idarə olunması, effektiv ünsiyyət texnikaları, işgüzar mühitdə etik normalar, komanda quruculuğu və fərdi yanaşma, qaynar xəttin iş prinsipləri, beynəlxalq təcrübə və digər mövzularda ətraflı məlumatlar verilib. Təlim zamanı aparılan qrup işləri və rollu oyunlar iştirakçıların mövzuya dair əldə etdikləri məlumatları praktik situasiyalarda tətbiq etmək imkanı yaradıb. Təlimin sonunda iştirakçılara sertifikatlar təqdim edilib. Qeyd edək ki, işğaldan azad olunmuş ərazilərə qayıdan əhaliyə səmərəli dəstək göstərmək məqsədilə dövlət qurumlarının əməkdaşlarının peşəkar bacarıqlarının artırılması istiqamətində təlimlər Komitə tərəfindən davam etdiriləcəkdir.
Regionlarda uşaqların asudə vaxtının səmərəli təşkili məqsədilə tədbirlər keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, İsmayıllı, Göygöl, Zərdab, Zaqatala Uşaq və Ailələrə Dəstək Mərkəzləri tərəfindən asudə vaxtın səmərəli təşkili, yeniyetmə və gənclərə xidmət göstərən dövlət müəssisələrinin fəaliyyətinin inkişaf etdirilməsi, bu sahədə çalışan mütəxəssis və əməkdaşların biliklərinin, bacarıqlarının və peşəkarlıq səviyyəsinin artırılması məqsədilə tədbirlər keçirilib. Tədbirlərdə yeniyetmə və gənclərə xidmət göstərən dövlət müəssisələrinin əməkdaşları, təhsil və mədəniyyət işçiləri, Uşaq Səfirlər Məclisinin rayon üzrə nümayəndələri, Mərkəzlərin ekspert qruplarının üzvləri, təhsildə fərqlənən məktəblilər, fəal gənclər, yazarlar, rayon ictimaiyyətinin nümayəndələri iştirak ediblər. Çıxış edənlər asudə vaxtın səmərəli şəkildə təşkil edilməsinin əhəmiyyətindən danışıb, ölkədə bu istiqamətdə görülən işlər, həyata keçirilən layihələrdən bəhs ediblər. Eyni zamanda asudə vaxtdan səmərəli istifadə edilməməsinin müxtəlif mənfi fəsadlara gətirib çıxara biləcəyi haqqında fikirlər səsləndirən natiqlər, gənclərin zərərli vərdişlərə qoşulmaması, sağlam həyat tərzinə cəlb edilməsi üçün onlarla birlikdə ekoloji layihələr, o cümlədən rayonlarda, kənd və qəsəbələrdə abadlıq, iməcilik işləri həyata keçirmək, idman yarışları təşkil etmək, mütaliəyə maraqlarını artıran layihələr keçirmək, muzeylərə, sərgilərə, tarixi yerlərə ekskursiyaların təşkil edilməsi kimi təkliflər səsləndirilib.
Regionlarda maarifləndirmə tədbirləri keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, Qəbələ, İsmayıllı, Göygöl, Goranboy, Zərdab, Zaqatala Uşaq və Ailələrə Dəstək Mərkəzləri tərəfindən bölgələrdə erkən nikah və qohumlar arasında nikahların qarşısının alınması, eləcə də uşaqların, qadınların, erkən və məcburi nikahda olan qadınların cinsi zəmində alçaldılması hallarının aradan qaldırılması istiqamətində silsilə maarifləndirici tədbirlər həyata keçirilib. Dini Qurumlarla İş üzrə Dövlət Komitəsi, Mərkəzlərin ekspert qrupları, yerli icra hakimiyyətləri, rayon polis şöbələri, təhsil sektorları, bələdiyyələr və Uşaq Səfirlər Məclisinin rayon üzrə nümayəndələrinin, valideyn və psixoloqların iştirakı ilə keçirilən tədbirlərdə müvafiq sahədə mövcud qanunvericilik aktları, qohum evliliyi və erkən nikahın fəsadları barədə ətraflı məlumat verilib. Böyük maraq və müzakirələrlə keçən tədbirlərin sonunda iştirakçılar tərəfindən mövcud problemlərin həlli istiqamətində səmərəliliyin artırılması ilə bağlı təkliflər səsləndirilib, belə görüşlərin daha çox keçirilməsinin vacibliyi vurğulanıb.
Şagird və valideynlərlə “İnternet təhlükəsizliyi” mövzusunda görüşlər keçirilib
Ailə, Qadın və Uşaq Problemləri üzrə Dövlət Komitəsi Elm və Təhsil Nazirliyinin dəstəyi ilə Xəzər rayonunun 262 və Qaradağ rayonunun 228 nömrəli tam orta məktəblərində “İnternet təhlükəsizliyi” mövzusunda görüşlər keçirib. Görüşlərdə Komitənin əməkdaşı Rafiq Mahmudov və “Ailəm könüllüləri”nin üzvləri Fidan Hacıyeva, Ayla Quliyeva, İlahə Nəcəfova, Şəfəq Rzayeva və Səidə Qədirova çıxış edərək şagird və valideynlərə kiber təhlükədən müdafiə, hüquq-mühafizə orqanlarına müraciət qaydaları, virtual məkanda ehtiyat tədbirləri, şəxsi məlumatların qorunması və məxfiliklə bağlı ətraflı məlumat veriblər. Sonda mövzu ətrafında müzakirələr aparılıb, iştirakçıların sualları cavablandırılıb
“İqlim dəyişikliyinin uşaqların sağlamlığına təsirləri” mövzusunda məktəblilər arasında ümumrespublika layihə müsabiqəsi davam edir
“Regional İnkişaf” İctimai Birliyi tərəfindən Ekologiya və Təbii Sərvətlər Nazirliyi, Kənd Təsərrüfatı Nazirliyi, Ailə, Qadın və Uşaq Problemləri üzrə Dövlət Komitəsi, Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyi, Azərbaycan Qida Təhlükəsizliyi İnstitutu, Səhiyyə Nazirliyinin İctimai Səhiyyə və İslahatlar Mərkəzi, Azərbaycan Sənaye Korporasiyası, ADA Məktəbi, Azərbaycan Mühəndislik Akademiyasi və “AzerGold” QSC-nin dəstəyi ilə həyata keçirilən “Qlobal iqlim dəyişikliyinin uşaqların sağlamlığına təsirləri” layihəsi çərçivəsində məktəblilər arasında ümumrespublika layihə müsabiqəsi elan edilib. VI-IX sinif şagirdləri üçün nəzərdə tutulan müsabiqədə hər məktəb 5 əsas və 3 ehtiyat olmaqla 8 nəfərdən ibarət bir komanda ilə təmsil oluna və yalnız bir layihə təqdim edə bilər. Hazırlıq mərhələsində komandalar təlim və vebinarlar vasitəsilə müsabiqənin qaydaları, layihə mövzuları və istiqamətləri, layihənin strukturu və digər şərtləri barədə ətraflı məlumatlandırılacaqlar. (Müsabiqənin keçirilmə qaydaları haqqında link vasitəsitəsilə ətraflı məlumat ala bilərsiniz.) Müsabiqədə iştirak etmək istəyən məktəblər link-dən istifadə edərək qeydiyyatdan keçməlidir. Qeydiyyat cari ilin 10 iyun tarixinədək davam edəcək. Təşkilat Komitəsi tərəfindən təqdim olunan layihələr iqlim dəyişikliyinin ətraf mühitə və uşaqların sağlamlığına mənfi təsirlərinin azaldılmasına zəmin yaradılması, nəzərdə tutulan fəaliyyətlərin real və icrasının mümkünlüyü, problemin həllində yaradıcı və innovativ yanaşmalara üstünlük verilməsi, layihə yekunlaşdıqdan sonra fəaliyyətlərin davamlılığının təmini, maliyyə səmərəliliyi və digər meyarlar əsasında qiymətləndiriləcək və ən uğurlu 5 layihə qalib elan olunacaq. Qalib komandalara layihənin icrası üçün büdcə məbləğində pul mükafatı veriləcək. Qeyd edək ki, layihənin məqsədi ölkəmizdə 2024-cü il “Yaşıl dünya naminə həmrəylik ili” elan edilməsi nəzərə alınaraq, bütün dünyanı narahat edən qlobal problemlərdən biri kimi iqlim dəyişikliyi və onun təsirləri barədə məktəbliləri maarifləndirmək, onları bu problemin həllində iştiraka və sağlam gələcək naminə ideyalarını bölüşərək həllər irəli sürməyə təşviq etməkdir. Layihə üzrə, həmçinin iqlim dəyişikliyinin uşaqların sağlamlığına təsirlərinə dair ümumrespublika Uşaq Forumunun keçirilməsi, məktəblilər arasından seçilmiş “iqlim səfirləri”nin və mütəxəssislərin iştirakı ilə paytaxt və regionlarda pilot orta ümumtəhsil məktəblərində maarifləndirici tədbirlərin, ekoloji aksiyaların təşkili və iqlim dəyişikliyi mövzusuna dair dərnəklərin yaradılması planlaşdırılır.
