Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Samuxda vətəndaş qəbulu keçiriləcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 26 iyul 2024-cü il tarixində, saat 10:00-da Samux rayonu Heydər Əliyev Mərkəzində vətəndaşları qəbul edəcək.Qəbulda Gəncə şəhər, Samux və Kəlbəcər rayon sakinlərinin ərizə, müraciət və təkliflərinə baxılacaq.
“Çempion ailələr” layihəsi uğurla başa çatıb
Azərbaycan Respublikasının Ailə, Qadın və Uşaq Problemləri üzrə Dövlət Komitəsi və “Regional İnkişaf” İctimai Birliyinin birgə təşkilatçılığı ilə, yerli icra hakimiyyətlərinin dəstəyi ilə bölgələrdə həyata keçirilən “Çempion ailələr” layihəsi çərçivəsində 27 iyun tarixində Qəbələ, 2 iyul tarixində Zərdab, 5 iyul tarixində Goranboy, 9 iyul tarixində Göygöl və 12 iyul tarixində Ağdam rayonlarında ailələrlə həvəskar idman yarışları keçirilib. Tədbirlərdə Dövlət Komitəsinin Qəbələ, Zərdab, Goranboy, Göygöl və Ağdam Uşaq və Ailələrə Dəstək Mərkəzlərinin və yerli icra hakimiyyətlərinin əməkdaşları, “Regional İnkişaf” İctimai Birliyinin və Birliyin regional bölmələrinin nümayəndələri iştirak ediblər. Növbəti 5 rayonda keçirilən tədbirlərdə 61 ailə iştirak edib. Hər bölgədə ailələrin iştirakı ilə şahmat və dama, ip dartma, kisədə yaxın məsafəyə qaçış, futbol və s. idman yarışları, ikinci hissədə isə intellektual müsabiqə keçirilib. Sonda ilk 3 yer üzrə qalib olan ailələrə və digər bütün iştirakçı ailələrə diplom və hədiyyələr, ailə məsələləri ilə bağlı şüarlar yazılmış eco qolbaqlar təqdim olunub.
Ümummilli Lideri Heydər Əliyevin hakimiyyətə gəlməsindən 55 il ötür
Bu gün Azərbaycan xalqının Ümummilli Lideri Heydər Əliyevin hakimiyyətə gəlməsindən 55 il ötür. Azərbaycan Kommunist Partiyası Mərkəzi Komitəsinin 1969-cu il iyulun 14-də keçirilən plenumunda Heydər Əliyev Azərbaycan Kommunist Partiyası Mərkəzi Komitəsinin birinci katibi seçilmişdir. Bununla da Ulu Öndərin Azərbaycana rəhbərliyi dövrü başlamışdır. Azərbaycanın hərtərəfli tərəqqisi və milli dövlətçiliyimizin dayanıqlı inkişafı onun hakimiyyətə gəlişi ilə başlamış, müstəqilliyimiz məhz onun sayəsində əbədi və dönməz xarakter almışdır. Öz müdrikliyi, qətiyyəti və zəkası, zəngin dövlətçilik təcrübəsi ilə ölkəmizi intibaha, iqtisadi yüksəlişə aparan Ümummilli Liderimizin ideyaları və strategiyası sayəsində ölkəmiz inqilabi dəyişikliklər yaşamışdır. Azərbaycan tarixinin son 55 ilinə nəzər salsaq, gələcəyə istiqamətlənmiş və cəmiyyətin rifahına hesablanan uzaqgörən siyasətin müsbət nəticələrini görərik. Bütün bunlar Ulu öndər Heydər Əliyevin Vətən üçün əvəzolunmaz xidmətləri və xalqına bəslədiyi sonsuz sevgi sayəsində olub. Ümummilli Liderin xatirəsini dərin ehtiramla yad edirik.
Regionlarda sağlamlıq və ailə planlaması mövzusunda maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsinin tabeliyində olan 11 Uşaq və Ailələrə Dəstək Mərkəzləri tərəfindən reproduktiv sağlamlıq və ailə planlaması mövzusunda məlumatlılıq səviyyəsinin artırılması məqsədilə müxtəlif yaş qrupundan olan icma sakinləri ilə maarifləndirici görüşlər keçirilib. Görüşlərin keçirilməsinin məqsədi maarifləndirmə vasitəsilə körpələrin sağlam doğulmasına, ana və körpə ölümünün sayının azalmasına, yoluxucu xəstəliklərin qarşısının alınmasına nail olmaqdır. Mütəxəssislərin iştirakı ilə baş tutan görüşlərdə mövzu ilə bağlı geniş məlumat verilib və qeyd olunub ki, reproduktiv sağlamlığın əsası uşaq və yeniyetməlik dövründə qoyulmalıdır. Reproduktiv sağlamlıq səviyyəsi insanın həyat tərzinə, ailədaxili münasibətlərinə, eləcə də əhval-ruhiyyəsinə ciddi təsir göstərir. Həmçinin sağlam həyat tərzinin erkən yaşdan təşviq edilməsinin, zərərli vərdişlərə aludəçiliyin qarşısının alınması üçün profilaktik tədbirlərin görülməsinin, müntəzəm surətdə tibbi müayinədən keçməyin əhəmiyyəti də vurğulanıb. Görüşlərdə iştirakçılara mövzuya dair maarifləndirici materiallar da paylanılıb.
Regionlarda maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsinin Ağdam, Goranboy, Göygöl, Hacıqabul, Saatlı, Sabirabad, Zərdab, İsmayıllı, Qəbələ, Zaqatala və Şüvəlan Uşaq və Ailələrə Dəstək Mərkəzləri tərəfindən ailələrin, valideynlərin və uşaqların internetdəki təhlükələr barədə məlumatlandırılması və regionlarda əhalinin rəqəmsallaşma istiqamətində bilik və bacarıqlarının artırılması məqsədilə maarifləndirici görüşlər keçirilib. Görüşlərdə UADM-lərin və aidiyyəti qurumların əməkdaşları, rayonun fəal gəncləri və icma sakinləri iştirak edib. Görüşlər zamanı mərkəz əməkdaşları internet əlçalatanlığının mənfi və müsbət tərəflərindən danışıb, həmçinin internetin yaratdığı asılılığın uşaqların fiziki və psixi sağlamlığına mənfi təsiri barədə məlumat verilib. Həmçinin mütəxəssislər tərəfindən internet üzərindən aparılan ödənişlərdə təhlükəsizliyin təmin edilməsi, kart dələduzluğuna qarşı mübarizə tədbirləri çərçivəsindəkartın itirilməsi, oğurlanması və ya səlahiyyətli olmayan şəxs tərəfindən istifadə edilməsi halları müəyyən edildiyi təqdirdə nə etməli, internet və mobil bankçılıqdan istifadə zamanı hansı məqamlara diqqət yetirmələri barədə məlumat verilib. Eyni zamanda iştirakçılara hər hansı şübhəli hal ilə rastlaşan zaman aidiyyəti orqanlara məlumat vermələri barədə tövsiyələr verilib. Sonda iştirakçılara mövzu ilə bağlı maarifləndirici materiallar paylanılıb.
11 iyul Ümumdünya Əhali Günüdür
Bu günün qeyd olunmasında məqsəd ailə planlaşdırılmasının əhəmiyyəti, gender bərabərliyi, yoxsulluq, qadın sağlamlığı və insan hüquqları kimi dünya əhalisi ilə bağlı müxtəlif məsələlər barədə məlumatlılığı artırmaq, insanların problemlərinə xüsusi diqqət yetirmək və ümumi inkişafa nail olmaqdır. Dünya Əhali Günü 2005-ci ildən etibarən Azərbaycanda geniş şəkildə qeyd edilir.
Uşaq və valideynlərlə maarifləndirmə işləri davam etdirilir
Ailə, Qadın və Uşaq Problemləri üzrə Dövlət Komitəsinin “Müharibədən zərər çəkən uşaq və ailələrə psixososial dəstək” layihəsi çərçivəsində Ağdam və Goranboy Uşaq və Ailələrə Dəstək Mərkəzləri tərəfindən Ağdam rayonunun Rzalar və Mahrızlı kənd məktəbləri, Goranboy rayonu Qaraçınar kənd məktəbi və Kəlbəcər rayonunun E.Hümbətov adına 63 saylı orta məktəbin şagirdləri olmaqla, ümumilikdə 100 nəfər psixoloji treninqlərə cəlb olunub. Yaşa görə formalaşdırılan qruplarda psixoloqların rəhbərliyi altında uşaqların daxili aləmini kəşf etməyə, emosiyalarını idarə etməyə, şəxsi məkanının sərhədlərini müəyyənləşdirməyə imkan verən psixoloji tapşırıqlar yerinə yetirilir, interaktiv oyunlar keçirilir və nəfəs texnikaları tətbiq olunur. Uşaqlarla yanaşı onların valideynləri ilə də psixoloji maarifləndirmə işi aparılır. Sosial pedaqoqlar tərəfindən valideyn bacarıqları, böhran vəziyyətində uşaqlara psixososial yardımın göstərilməsi, valideyn-övlad münasibətləri və s. mövzularda təlimlər keçirilir. Qeyd edək ki, 2021-ci ildən etibarən həyata keçirilən layihənin məqsədi müharibədən zərər çəkmiş, böhran vəziyyətində olan uşaq və ailələrin psixososial rifahını yaxşılaşdırmaq, uşaqların emosiya və hisslərini ifadə etməsinə köməklik göstərmək, stressə davamlılığı gücləndirmək, psixi sağlamlığı möhkəmləndirmək, cəmiyyətə inteqrasiyasını sürətləndirmək, özünüqiymətləndirməsini və fəaliyyət qabiliyyətini yüksəltməkdir. Layihənin iyul ayının sonuna qədər davam etdirilməsi nəzərdə tutulub.
Şamaxı rayonunda uşaqlar üçün yay düşərgəsi təşkil edilir
Ailə, Qadın və Uşaq Problemləri üzrə Dövlət Komitəsinin təşkilatçılığı ilə ümumilikdə 66 nəfəri əhatə edən düşərgədə Komitənin 11 Uşaq və Ailələrə Dəstək Mərkəzlərinin benefisiarları olan şəhid və qazi ailələrinin, həmçinin aztəminatlı ailələrinin uşaqları iştirak edəcək. Düşərgənin ilk günündə Komitənin Ailə məsələləri şöbəsinin Ailə problemləri sektorunun müdiri Aydın Rəcəbli açılış nitqi ilə çıxış edərək, iştirakçıları salamlayıb, düşərgənin məqsədi və təlim proqramı barədə məlumat verib. Yay düşərgəsinin keçirilməsində məqsəd uşaq və yeniyetmələrin fiziki və mənəvi inkişafı, asudə vaxtlarının səmərəli təşkili, onların həmyaşıdları ilə maraqlı və əyləncəli vaxt keçirməsi, yay tətilinin mənalı və yaddaqalan olması, uşaqlara yeni bacarıqların aşılanmasıdır. Düşərgə müddətində uşaqlara uşaq hüquqları, şəxsi inkişaf mövzularında təlimlərin, rəqs üzrə ustad dərslərin keçirilməsi, müxtəlif idman oyunları, kino-cizgi film saatının, musiqili-əyləncəli proqramların, “Yaşıl dünya naminə həmrəylik ili” çərçivəsində iməcilik, Nəsirəddin Tusi adına Şamaxı Astrofizika Rəsədxanası və Şamaxı Safari Parkına ekskursiyaların təşkili nəzərdə tutulur. Qeyd edək ki, uşaqlar üçün yay düşərgəsi 3 dəfə olmaqla, 08-14 iyul, 29 iyul-04 avqust və 19-25 avqust 2024-cü il tarixlərində Şamaxı rayonunda keçiriləcək.
Regionlarda məişət zorakılığının qarşısının alınması mövzusunda keçirilən təlimlər yekunlaşıb
Ailə, Qadın və Uşaq Problemləri üzrə Dövlət Komitəsinin təşkilatçılığı ilə 5 region üzrə 40 rayonda (Kürdəmir, Hacıqabul, Şirvan, Salyan, İmişli, Neftçala, Saatlı, Sabirabad, Bərdə ,Ağcabədi, Ağdam, Beyləqan, Cəbrayıl, Füzuli, Xocalı, Xocavənd,Tərtər,Şamaxı, İsmayıllı, Ağdaş, Ağsu, Göyçay, Qobustan, Ucar, Zərdab, Gədəbəy,Qazax, Ağstafa, Tovuz, Daşkəsən, Kəlbəcər, Şəmkir, Qubadlı, Şuşa, Zəngilan, Abşeron, Xızı, Siyəzən, Laçın, Sumqayıt) respublika üzrə rayon və şəhər icra hakimiyyətlərində yaradılmış Məişət zorakılığının qarşısının alınması sahəsində monitorinq və əlaqələndirmə qrupları üçün keçirilən məişət zorakılığının qarşısının alınması mövzusunda təlimlərə yekun vurulub. Sumqayıt şəhərində keçirilən yekun tədbirdə çıxış edən Dövlət Komitəsinin sədr müavini Sədaqət Qəhrəmanova öz fəaliyyətlərini həyata keçirən zaman “Məişət zorakılığının qarşısının alınması haqqında” Azərbaycan Respublikasının Qanununun tələblərini rəhbər tutaraq, baş vermiş zorakılıq halları ilə əlaqədar qabaqlayıcı tədbirlərin görülməsinin vacibliyini iştirakçıların diqqətinə çatdırmış, bu istiqamətdə bələdiyyələrin imkanlarından istifadə olunmasının vacıbliyini vurğulamışdır. Komitə əməkdaşları Vəfa Ələkbərova , Rahil Süleymanzadə və İradə Məmmədova tərəfindən aparılan təlimlər zamanı müvafiq mövzuda təqdimatlarla yanaşı, həm də Dövlət Komitəsinə məişət zorakılığı ilə bağlı daxil olan cavab məktublarının təhlili aparılıb, nöqsanların aradan qaldırılması kimi məsələlər müzakirə edilib. 185 nəfərin iştirak etdiyi təlimlərin keçirilməsində məqsəd iştirakçıları “Məişət zorakılığının qarşısının alınması haqqında” Azərbaycan Respublikasının Qanununa edilən yeni düzəlişlərlə tanış etməklə yanaşı, məişət zorakılığının qarşısının alınması istiqamətində tədbirlərin gücləndirilməsi, zorakılıqla mübarizə sahəsində profilaktik işin görülməsi olub. Sonda təlim iştirakçılarına “Məişət zorakılığı qurbanlarının hüquqları” adlı bukletlər paylanılıb.
