Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Sağlam körpəni sağlam ata-ana dünyaya gətirir! Ailəni planlaşdırsan, gələcəyini planlaşdırmış olarsan!” şuarları ilə tələbələrlə görüşlər keçirilib
Ailə, Qadın və Uşaq Problemləri üzrə Dövlət Komitəsi tərəfindən Elm və Təhsil Nazirliyinin dəstəyi və Səhiyyə Nazirliyinin ekspertinin iştirakı ilətəhsil müəssisələrində keçirilən maarifləndirici görüşlərin davamı olaraq 13 mart 2025-ci il tarixində Azərbaycan Dövlət Mədəniyyət və İncəsənət Universitetinin nəzdində Humanitar Kollecdə və 14 mart 2025-ci il tarixində isə Azərbayca Texniki Universitetinin nəzdində Bakı Texniki Kollecdə “Sağlam körpəni sağlam ata-ana dünyaya gətirir! Ailəni planlaşdırsan, gələcəyini planlaşdırmış olarsan!” şuarları ilə tələbələrlə görüş keçirilib. Görüşdə Ailə, Qadın və Uşaq Problemləri üzrə Dövlət Komitəsinin Ailə məsələləri şöbəsinin müdir müavini Kamila Əliyeva və Səhiyyə Nazirliyinin İctimai Səhiyyə İslahatlar Mərkəzinin həkim-metodisti Zümrüd Kazımova çıxış edib. Çıxışlar zamanı tələbələrə uşaq və gənclərin sağlam nəsil kimi formalaşması, ailələrin sağlamlığının qorunması, sağlam uşaqların dünyaya gəlməsi istiqamətində ölkədə görülən işlər barədə ətraflı məlumat, eləcə də ailə planlaşdırılması və reproduktiv sağlamlığının qorunmasına dair tövsiyələr verilib. Görüşün sonunda iştirakçıların sualları cavablandırılıb. Görüşlərdən ümumilikdə 300 nəfər iştirakçı faydalanıb.
“Balaca Günəşlər”in yaz düşərgəsi başa çatdı
14 mart 2025-ci il tarixində Ailə, Qadın və Uşaq Problemləri üzrə Dövlət Komitəsinin Daun sindromlu uşaqlar üçün təşkil etdiyi yaz düşərgəsinin bağlanış mərasimi keçirilib. Tədbiri giriş sözü ilə açan Komitənin sədr müavini Aynur Sofiyeva, iştirakçıları salamlayıb. Sağlamlıq imkanları məhdud olan uşaqların reabilitasiyası, sosial xidmətlərlə təmin olunması, cəmiyyətə inteqrasiyası və onların valideynlərinə psixo-sosial dəstəyin göstərilməsi məqsədilə Dövlət Komitəsi tərəfindən ənənəvi olaraq təşkil edilən yaz düşərgəsinin uğurla yekunlaşdığını bildirib. A. Sofiyeva, dövlət uşaq siyasətinin prioritet istiqamətlərindən birinin sağlamlıq imkanları məhdud uşaqlara, onların ailələrinə diqqət və qayğı olduğunu qeyd edərək, Komitənin bu məsələləri daim diqqətdə saxladığını, belə layihələrin gələcəkdə daha genişmiqyaslı keçiriləcəyini vurğulayıb. Daha sonra düşərgə müddətində yaddaqalan anları, valideynlərin və uşaqların təəssüratlarını əks etdirən video-çarx nümayiş olunub. Davamında “balaca günəşlər” hazırladıqları rəqsləri nümayiş etdiriblər. Yekunda uşaqlara hədiyyələr paylanılıb. Qeyd edək ki, 5 mart tarixindən başlayan düşərgəyə 25 uşaq valideyni ilə qatılıb. Düşərgədə hər gün psixoloq, sosial işçi və təlimçilər tərəfindən inkişafetdirici təlimlər, interaktiv oyunlar, eləcə də art-terapiya, idman məşğələləri, rəqs dərsləri, iştirakçıların asudə vaxtının səmərəli təşkili məqsədilə əyləncə proqramları, maraqlı ekskursiyalar təşkil olunub.
Regionlarda uşaqların doğulanadək cins seçiminin qarşısının alınması məqsədilə maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsinin tabeliyində olan Ağdam, Şüvəlan, Saatlı, Sabirabad, Hacıqabul, Qəbələ, İsmayıllı, Zərdab, Zaqatala, Goranboy, Göygöl Uşaq və Ailələrə Dəstək Mərkəzləri tərəfindən 10-14 mart 2025-ci il tarixlərində rayonlarda, eləcə də kənd və qəsəbələrdə mərkəzlərin ekspert qruplarının üzvləri, tibb işçiləri, tələbələr, müəllimlər və icma sakinlərinin iştirakı ilə uşaqların doğulanadək cins seçiminin qarşısının alınması məqsədilə maarifləndirici görüşlər keçirilib. Tədbirlərdə çıxış edənlər mövzunun aktuallığından bəhs edib, ölkəmizdə uşaqların doğulanadək cins seçiminin qarşısının alınması, gender stereotiplərinin aradan qaldırılması istiqamətində görülən işlərdən danışıblar. Qeyd edilib ki, selektiv abortlarhəm qadınların reproduktiv sağlamlığına böyük zərbə vurur, həm də hamiləliyin süni şəkildə pozulması oğlan uşaqlarının sayının artmasına gətirib çıxarır və bu da gələcəkdə ölkənin demoqrafik, sosial-iqtisadi inkişafına mənfi təsir göstərə bilər. Tədbirlərdə iştirakçılara övladlar arasında cinsi ayrı-seçkilik etməmək, hər bir uşağa sevgi, qayğı və hörmətlə yanaşmaq, gələcək nəslin sağlam və bilikli olması məqsədilə həyata keçirilən layihələrdə yaxından iştirak etmək tövsiyə edilib. Tədbirlərdə mövzu ətrafında müzakirələr aparılıb, sosial çarxlar nümayiş etdirilib, iştirakçıları maraqlandıran suallar cavablandırılıb.
Bahar Muradova BMT-nin Qadınlar üzrə Agentliyinin icraçı direktorunun müavini Kirsi Madi ilə görüşüb
BMT-də Qadınların Statusu Komissiyasının 69-cu sessiyası çərçivəsində Nyu-Yorkda səfərdə olan Ailə, Qadın və Uşaq Problemləri üzrə Dövlət Komitəsinin sədri Bahar Muradova BMT-nin Qadınlar üzrə Agentliyinin icraçı direktorunun müavini Kirsi Madi ilə görüşüb. Görüşdə COP29 və COP30 çərçivələrində əməkdaşlıq, qadınların iqtisadi baxımdan gücləndirilməsi, insan kapitalının inkişafı kontekstində qadınların qüvvətləndirilməsi və “Pekin +30” fəaliyyət gündəliyi müzakirə olunub. Komitə sədri BMT strukturu ilə əməkdaşlıqdan məmnunluğunu ifadə edərək, qadınların qlobal proseslərdə iştirakı və bu istiqamətdə birgə fəaliyyətin vacibliyini vurğulayıb. O, Azərbaycanın COP29-a sədrliyi zamanı gender mövzusunun geniş müzakirə edildiyini vurğulayıb . B. Muradova işğaldan azad edilmiş ərazilərdə “ağıllı şəhər” və “ağıllı kənd” layihələrinin həyata keçirildiyini bildirərək, qadınların yeni şəraitə uyğunlaşması üçün əməkdaşlığın davam etdirilməsinin vacibliyini qeyd edib. BMT Qadınlar Təşkilatının icraçı direktorunun müavini Kirsi Madi Azərbaycanı COP29-un uğurla keçirilməsi münasibətilə təbrik edib və COP30 çərçivəsində əməkdaşlığı davam etdirməyə hazır olduqlarını bildirib. O, Qadınların Statusu Komissiyasının 69-cu sessiyasının Pekin Bəyannaməsinin 30 illiyi ilə üst-üstə düşdüyünü qeyd edərək qadınların rifahının artırılması üçün 6+1 prioritetin müəyyən edildiyini vurğulayıb. Gender bərabərliyinin və qadınların səlahiyyətlərinin gücləndirilməsinin təmin edilməsinin əhəmiyyətini qeyd edən BMT rəsmisi, Dövlət Komitəsinin bu sahədə həyata keçirdiyi fəaliyyəti yüksək qiymətləndirərək, səylərin davam etdirilməsinin vacibliyini vurğulayıb.
“Həyatının memarı-Sən özünsən” adlı layihə çərçivəsində maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsi və Bakı şəhəri üzrə Təhsil İdarəsinin birgə təşkilatçılığı, Səhiyyə Nazirliyinin və Elm və Təhsil Nazirliyinin dəstəyi ilə Bakının 53, 335 və 270 nömrəli tam orta məktəblərində narkomaniya ilə mübarizə məqsədli maarifləndirici görüşlər keçirilib. Dövlət Komitəsinin Ailə məsələləri şöbəsinin əməkdaşı Nailə İbrahimova, Səhiyyə Nazirliyinin İctimai Səhiyyə və İslahatlar mərkəzinin həkim-mütəxəssisi Ülkər Camalova narkomaniyanın insan sağlamlığına zərəri, cəmiyyət üçün yaratdığı problemlər və onunla mübarizə istiqamətində həyata keçirilən kompleks tədbirlər barədə geniş məlumat verərək, sağlam həyatın vacibliyindən danışıblar. Yuxarı sinif şagirdləri, valideyn və məktəb psixoloqlarının iştirak etdiyi görüşlərdə yeniyetmə və gənclərin elmə, idmana marağının artırılması, asudə vaxtının düzgün təşkil olunmasının əhəmiyyətindən bəhs edilib. İştirakçıların maraqla dinlədiyi məruzələr ətrafında aparılan müzakirələrdən sonra “Narkomaniya yox edir!” video-çarxı nümayiş etdirilib və çap vəsaitləri paylanılıb.
Qadınlara qarşı ayrı-seçkiliyin ləğv olunması üzrə Komitəsinin (CEDAW) üzvü Elgün Səfərov Cenevrə şəhərində gender bərabərliyinə həsr olunmuş illik konfransda video müraciətlə çıxış edib
Cenevrə şəhərində Milli İnsan Hüquqları Təsisatlarının Qlobal Alyansının (GANHRI) gender bərabərliyinə həsr olunmuş illik konfransı keçirilib. Konfransda Qadınlara qarşı ayrı-seçkiliyin ləğv olunması üzrə Komitəsinin (CEDAW) üzvü Elgün Səfərov video müraciətlə çıxış edib. E.Səfərov dünyada baş verən münaqişələrin qadın hüquqlarının təmininə ciddi təsir göstərdiyini bildirib. O çıxışında müharibələr nəticəsində minalardan əziyyət çəkmiş mülki əhali, əsir və itkin düşmüş insanlar, xüsusilə qadın və uşaqların taleyindən bəhs edib. Eyni zamanda Dayanıqlı İnkişaf Məqsədləri, gender bərabərliyinin təmin edilməsi və insan hüquqlarının vacibliyindən danışıb. Qeyd edək ki, tədbirdə dünyanın müxtəlif ölkələrindən milli insan hüquqları təsisatlarının rəhbər və nümayəndələri, habelə beynəlxalq təşkilatların təmsilçiləri və ekspertlər iştirak edib.
Bahar Muradova “Rəqəmsal trendlər: qadın sahibkarlığı və gələcək iqtisadiyyat formalaşdırılması” adlı yan tədbirdə çıxış edib
BMT-də Qadınların Statusu Komissiyasının 69-cu sessiyası çərçivəsində “Rəqəmsal trendlər: qadın sahibkarlığı və gələcək iqtisadiyyat formalaşdırılması” adlı yan tədbir keçirilib. Türkiyə Respublikasının Ailə və Sosial Xidmətlər Nazirliyinin təşkilatçılığı ilə baş tutan tədbirdə Dövlət Komitəsinin sədri Bahar Muradova çıxış edib. Bahar Muradova Azərbaycanın işğaldan azad olunmuş torpaqlarında aparılan işlər barədə qonaqları məlumatlandırıb və qeyd edib ki, bu sahədə Azərbaycanın təcrübəsi unikaldır və öyrənilməsi vacibdir: “Bu ərazilər həm bizim istifadəmizdən çıxmışdı, həm də orada yaşayan əhali doğma yerlərindən kənarda məskunlaşmışdı. Bu prosesdə onların yeni həyata qatılması və uğur qazanması çətin idi. Azərbaycan hökuməti də daha çox bu şəxslərin dövlətin imkanları hesabına yaşayışını təmin etdi”. B.Muradova qeyd edib ki, azad olunmuş ərazilərə qayıdan əhalinin, xüsusilə qadınların yeni yaradılmış standartlar səviyyəsində yaşayış vərdişlərini və bacarıqlarını əldə etmələri üçün təlimlər keçirilir. Onun sözlərinə görə, Azərbaycan hökuməti bu ərazidə də daha çox ailə bizneslərinin, xüsusilə qadınların rəhbərlik etdiyi bizneslərin yaradılmasına üstünlük verir. Qadınların iqtisadi səlahiyyətlərinin və biznes bacarıqlarının artırılması, məşğulluq sahəsində gender fərqlərinin aradan qaldırılmasına yönəlmiş layihələrdən bəhs edən B. Muradova qeyd edib ki, ölkəmizdə məşğul əhalinin 48 faizini, sahibkarların isə 23 faizini qadınlar təşkil edir. “Regionlarımızdakı mərkəzlər vasitəsilə qadınlarımız həm bacarıqlar əldə edir, biznes layihələr hazırlayır, maliyyə mənbələrini əldə etməsi üçün dəstək alır, həm də onları təqdim etmək, bazarlara çıxarmaq, satış imkanları əldə etmək üçün dövlətin və müvafiq qurumların dəstəyini alır”- deyə Komitə sədri əlavə edib. B.Muradova vurğulayıb ki, getdikcə həm torpaq sahibkarlarının, həm də biznes subyektlərinin sırasında qadınların sayı artmaqdadır. O bildirib ki, dövlət məsələnin bu istiqamətinə ciddi diqqət yetirir və bu sahədə atılmış addımlar qısa müddətdə müsbət nəticələrini verəcək. Komitə sədri bu mövzunun bütün beynəlxalq platformalarda müzakirəsinin və bununla bağlı əməkdaşlığın artırılmasının vacib olduğunu diqqətə çatdırıb.
“Dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələblər “ Azərbaycan Respublikasının Nazirlər Kabinetinin 68 nömrəli 10 mart 2025-ci il tarixli Qərarı ilə təsdiq olunmuşdur
“Dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələblər” “Uşaq hüquqları haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2024-cü il 29 noyabr tarixli 78-VIIQD nömrəli Qanununun tətbiqi və “Uşaq hüquqları haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 1998-ci il 24 avqust tarixli 761 nömrəli Fərmanında dəyişiklik edilməsi haqqında” Azərbaycan Respublikası Prezidentinin 2024-cü il 24 dekabr tarixli 262 nömrəli Fərmanının 2.1.1-ci yarımbəndinin və Azərbaycan Respublikası Prezidentinin 2020-ci il 27 noyabr tarixli 2306 nömrəli Sərəncamı ilə təsdiq edilmiş “Uşaqlara dair Strategiyanın həyata keçirilməsi üzrə 2020–2025-ci illər üçün Fəaliyyət Planı”nın 5.1.3-cü yarımbəndinin icrasını təmin etmək məqsədilə hazırlanmışdır. Dövlət və qeyri-dövlət uşaq müəssisələrində göstərilən xidmətlərin keyfiyyətinə dair Tələblər “Uşaq hüquqları haqqında” Azərbaycan Respublikası Qanununun 29-1-ci maddəsinə uyğun olaraq hazırlanmışdır və dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələbləri müəyyən edir. Qanunvericiliyə əsasən, uşaq hüquqlarının həyata keçirilməsinə dövlət nəzarətinin formalarından biri olaraq, uşaq müəssisələrində keçirilən monitorinqlər zamanı qeyd edilən tələblər nəzərə alınacaq. “Dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələblər” aşağıdakı məsələləri əhatə edir: 1. Müəyyən edilmiş tələblər aşağıda sadalanan dövlət və qeyri-dövlət uşaq müəssisələrinə aiddir: · təhsil müəssisələri; · sosial xidmət müəssisələri; · açıq və qapalı tipli xüsusi təlim-tərbiyə müəssisələri; · yetkinlik yaşına çatmayanların tərbiyə müəssisələri; · yetkinlik yaşına çatmayanlar üçün müvəqqəti təcridetmə mərkəzləri; · tibb müəssisələri; · qanunvericiliklə müəyyən edilmiş qaydada yaradılan digər dövlət və qeyri-dövlət müəssisələri. 2. Müəyyən edilmiş Tələblər aşağıdakı sahələri əhatə edir: · müəssisələrdə xidmətlərin təşkili; · yaşayış şəraiti; · qidalanma; · sağlamlığın mühafizəsi; · təlim-tərbiyə və asudə vaxtın təşkili. Müəssisələrdə göstərilən xidmətlərin təşkilinə dair tələblər- müəssisənin müasir tələblər səviyyəsində qurulması və uşaqların əqli, fiziki və psixoloji inkişafının təmin edilməsi üçün uyğun şəraitin yaradılması, işçilərin ilkin və dövri olaraq icbari tibbi müayinədən keçirilməsi, uşağın müəssisəyə qəbulu, yerdəyişməsi və müəssisəni tərk etməsi ilə əlaqədar müəssisənin fəaliyyətini tənzimləyən normativ hüquqi aktlarla müəyyən edilmiş tələblərə əməl olunması, müəssisədaxili intizam qaydalarının uşaqların hüquq və azadlıqları, qanuni maraqları nəzərə alınmaqla hazırlanması və s. məsələləri əhatə edir. Müəssisələrdə yaşayış şəraitinə dair tələblər- yaşayış sahəsinin adambaşına düşən sahəsinin hər bir müəssisə üçün qanunvericiliklə müəyyən edilmiş normalara uyğunluğu, otaqların səliqəli və təmiz olması, uşaqların maraqlarına uyğun lazımi avadanlıqla təchiz edilməsi, hər bir uşaq üçün ayrıca çarpayı, təmiz yataq dəsti, paltarların saxlanması üçün dolabın olması, ayrıca paltardəyişmə otağının olması, yataq otaqlarının uşaqların yaşı, cinsi (5 yaşdan yuxarı uşaqlar üçün) və digər xüsusiyyətləri nəzərə alınmaqla təchiz edilməsi, fərdi və qrup məşğələləri üçün otaqların olması, otaqların işıqlı, mövsümdən asılı olaraq isti və ya sərin olması və s. məsələləri əhatə edir. Müəssisələrdə qidalanmanın təşkilinə dair tələblər- uşaqların minimum keyfiyyəti və təhlükəsizliyi qida təhlükəsizliyi sahəsində texniki normativ hüquqi aktların tələblərinə cavab verən qida ilə təmin edilməsi, qida məhsullarının hazırlanması, saxlanması, daşınması zamanı qida məhsullarının təhlükəsizliyinin və yararlılığının təmin edilməsi, qida məhsullarının mikrobioloji, kimyəvi və fiziki çirklənməsinin qarşısının alınması, qida məhsullarının xüsusiyyətlərinə uyğun temperatur rejiminə riayət edilməsi və digər tələbləri özündə ehtiva edir. Müəssisələrdə sağlamlığın mühafizəsinə dair tələblər- uşaqların müəssisənin yerləşdiyi ərazi üzrə tibb müəssisəsində uçota götürülməsinin təmin olunması, “Uşaqların icbari dispanserizasiyası haqqında” Azərbaycan Respublikasının Qanunu ilə müəyyən edilmiş qaydada uşaqların icbari dispanserizasiyadan keçirilməsinin nəzarətdə saxlanılması, müəssisə daxilində hər uşaqla bağlı aparılmış müayinə və müalicə-sağlamlaşdırıcı tədbirlərin qeydiyyatının aparılması, tibbi müayinə və nəzarətə ehtiyacı olan uşaqların dövlət tibb müəssisələrinə müayinə və müddətli müalicəyə təxirəsalınmadan göndərilməsi, epidemioloji və yoluxucu xəstəliklər, təbii fəlakətlər zamanı lazımi profilaktik tədbirlərin görülməsi, uşaqların yerli milli peyvənd təqviminə əsasən immunizasiyaya cəlb edilməsini və digər tələbləri özündə ehtiva edir. Müəssisələrdə təlim-tərbiyə və asudə vaxtın təşkilinə dair tələblər- uşaqların təhsil qanunvericiliyi ilə müəyyən edilmiş qaydada təhsil hüququnun və özünüifadə imkanlarının təmin edilməsi, uşaqlar üçün öyrədici mühitin yaradılması, məktəbəqədər yaşlı uşaqlar üçün yaşa uyğun tərbiyə qruplarının təşkil edilməsi, şagirdlərin dərsə davamiyyətinin qənaətbəxş olması, sağlamlıq imkanları məhdud olan uşaqların təhsil hüququnun həyata keçirilməsi üçün şəraitin yaradılması və digər məsələləri əhatə edir.
Yuxarı sinif şagirdləri ilə narkomaniyanın fəsadları mövzusu müzakirə edilib
Ailə, Qadın və Uşaq Problemləri üzrə Dövlət Komitəsinin və Nəsimi Rayon Polis İdarəsinin təşkilatçılığı ilə narkomaniyanın fəsadları və şagirdlərin davranış qaydaları mövzularında 19, 266 və 14 nömrəli məktəblərin şagirdləri üçün maarifləndirici görüş keçirilib. Yuxarı sinif şagirdlərinin iştirak etdiyi görüşdə Dövlət Komitəsinin Uşaq məsələləri şöbəsinin əməkdaşı Həsən Əliyev narkotik asılılığından əziyyət çəkən insanların üzləşdiyi çətinliklərdən danışıb. Bu asılılığın uşaqlar arasında yayılmaması üçün onları ayıq-sayıq olmağa çağırıb. Narkomaniya ilə mübarizə sahəsində atılması zəruri olan addımlar haqqında uşaqlara məlumat verilib. Nəsimi Rayon Polis İdarəsinin Yetkinlik yaşına çatmayanlarla iş üzrə polis mayoru Yeganə Zeynalova görüşdə şagirdlərin davranış qaydaları barədə uşaqları maarifləndirib. Sonda uşaqların sualları cavablandırılıb.
