Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Zəfər Gedişi” – Zəfər Gününə həsr olunmuş şahmat yarışı keçirilib
Ailə, Qadın və Uşaq Problemləri üzrə Dövlət Komitəsinin dəstəyi, “Azərbaycan Uşaqlarının İnkişaf Platforması” İctimai Birliyi və “Premier” Şahmat Məktəbinin birgə təşkilatçılığı ilə 8 Noyabr – Zəfər Gününə həsr olunmuş “Zəfər Gedişi” adlı şahmat yarışı keçirilib. Layihənin məqsədi şagirdlər arasında intellektual inkişafı təşviq etmək, strategiya, məntiqi düşüncə və qərarvermə bacarıqlarının gücləndirilməsinə dəstək olmaqdır. Tədbirdə fəxri qonaq qismində iştirak edən Dövlət Komitəsinin sədr müavini, Azərbaycanın ilk beynəlxalq qrossmeysteri Aynur Sofiyeva çıxışı zamanı bildirib ki, Zəfərimizin 5 illiyi ərəfəsində bu gün Azərbaycan xalqının birliyinin, iradəsinin və ədalətli mübarizəsinin təntənəsini yaşayırıq. Prezidentin qətiyyətli rəhbərliyi, ordumuzun peşəkarlığı və xalq-dövlət birliyi siyasi tariximizdə yeni bir mərhələnin əsasını qoydu. Bu gün əldə etdiyimiz uğurları gələcəyə daşımaq isə uşaqlarımızın üzərinə düşür. Buna görə də hər bir gənc layiqli, vətənpərvər, milli-mənəvi dəyərlərə hörmət ruhunda böyüyərək, yaxşı təhsil almalı və özünü daim inkişaf etdirməlidir. Şahmatla bağlı zəngin təcrübəsini yarışmaçılarla bölüşən A.Sofiyeva şahmatın uşaqların həyatındakı rolundan danışaraq bildirib ki, şahmat yalnız bir oyun deyil, həm də strateji düşüncənin, səbrin və əzmkarlığın təcəssümüdür. O bildirib ki, şahmatla məşğul olmaq uşaqların məntiqi təfəkkürünü, diqqət və məsuliyyət hissini inkişaf etdirir, gələcək həyatlarında düzgün qərarlar qəbul etmələrinə kömək edir. A.Sofiyeva vurğulayıb ki, bu sahəyə marağın artırılması uşaqların intellektual inkişafına və vətənpərvər ruhda formalaşmasına mühüm töhfə verəcəkdir. O, çıxışının yekununda uşaqlara yarışda uğurlar arzulayıb. Daha sonra 14–17 yaşarası şagirdlər şahmat üzrə fərdi bacarıqlarını nümayiş etdirərək qalibiyyət uğrunda mübarizə aparıblar. Turnirin sonunda qaliblər diplom və hədiyyələrlə, bütün iştirakçılar isə serifikatla təltif olunublar.
Zəfər Gününün beşinci ildönümü ilə əlaqədar silsilə tədbirlər keçirilir
8 Noyabr – Zəfər Gününün beşinci ildönümü ilə əlaqədar Ailə, Qadın və Uşaq Problemləri üzrə Dövlət Komitəsinin tabeliyində olan Ağdam, Şüvəlan, Saatlı, Sabirabad, Hacıqabul, Zərdab, Qəbələ, İsmayıllı, Göygöl, Goranboy, Zaqatala Uşaq və Ailələrə Dəstək Mərkəzləri tərəfindən vətənpərvərlik mövzusunda tədbirlər, intellektual yarışlar keçirilib, şəhid ailələri, müharibə iştirakçılarının ailələri ziyarət edilib. UADM-lərdə, rayon Heydər Əliyev Mərkəzi və təhsil müəssisələrində keçirilən görüşlərdə mərkəzlərin və müvafiq qurumların əməkdaşları, şəhid ailəsinin üzvləri, müharibə iştirakçıları, müəllimlər, məktəblilər və rayon ictimaiyyətinin nümayəndələri iştirak ediblər. TədbirlərdəAzərbaycan Respublikasının Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilərək, Zəfər Gününün tarixi əhəmiyyətindən, Silahlı Qüvvələrimizin Vətən müharibəsində göstərdiyi qəhrəmanlıqlardan danışılıb. Çıxış edənlər bu qələbənin tariximizdə mühüm yer tutduğunu bildirib, Müzəffər Ali Baş Komandan, Azərbaycan Respublikasının Prezidenti İlham Əliyevin rəhbərliyi ilə Azərbaycan Ordusunun rəşadətinin,cəsarətinin və vətən sevgisinin ən gözəl vətəndaşlıq nümunəsi olduğunu xüsusi vurğulayıblar. Eyni zamanda işğaldan azad olmuş ərazilərdə həyata keçirilən yenidənqurma, bərpa və quruculuq işlərindən, sakinlərin böyük sevinc hissi ilə ata-baba yurdlarına qayıtmasından danışılıb, Vətən müharibəsi iştirakçıları keçdikləri döyüş yolundan bəhs ediblər. Tədbirlərdə şagirdlər tərəfindən qələbəyə həsr olunmuş şeirlər, mahnılar səsləndirilib, bədii kompozisiyalar nümayiş etdirilib. Ailələrə səfərlər zamanı şəhidlərimizin, müharibə iştirakçılarının şərəfli döyüş yolundan bəhs edilib, ailələrin qayğıları ilə maraqlanılıb, igidlərimizin keçdiyi Zəfər yolu haqqında söhbətlər aparılıb, şəhidlərimizin əziz xatirəsinin hər zaman qəlblərdə yaşayacağı qeyd edilib
“Zəfərdən ilhamlanan gəncliklə gələcəyə” adlı konfrans keçirilib
Ailə, Qadın və Uşaq Problemləri üzrə Dövlət Komitəsi, Yeni Azərbaycan Partiyası (YAP) Sabunçu Rayon Təşkilatı və Bakı Gənclər Mərkəzinin birgə təşkilatçılığı ilə 8 Noyabr - Zəfər Gününün beşinci ildönümü münasibətilə “Zəfərdən ihamlanan gəncliklə gələcəyə” adlı konfrans keçirilib. Əvvəlcə Ümummilli lider Heydər Əliyevin abidəsi önünə gül dəstələri düzərək əziz xatirəsi dərin ehtiramla yad edilib. Azərbaycan Respublikasının Dövlət Himni səsləndirildikdən sonra Ümummilli lider Heydər Əliyevin və ölkəmizin azadlığı, ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib. Tədbiri giriş sözü ilə açan YAP Sabunçu Rayon Təşkilatının sədri Araz Xudadanov bildirib ki, Azərbaycanın müstəqil dövlət kimi mövcudluğu yalnız beynəlxalq hüquqi sənədlərlə deyil, həm də xalqımızın qəhrəmanlıq mübarizəsi ilə təmin edilmişdir. 2020-ci ilin 27 sentyabr tarixində başlanan və 44 gün davam edən Vətən Müharibəsi Azərbaycanın müasir tarixində dönüş nöqtəsidir. Ali Baş Komandanımızın qətiyyətli mövqeyi, Azərbaycan əsgərinin rəşadəti, şücaəti, xalqımızın birliyi, həmrəyliyi nəticəsində düşmənin müqaviməti qırıldı və 8 noyabr şanlı tariximizə Qələbə Günü kimi yazıldı. Zəfər Gününün mənəvi əhəmiyyəti yalnız torpaqlarımızın azad olunması ilə məhdudlaşmır. Bu Qələbə Azərbaycan xalqının milli həmrəyliyinin, vətənpərvərlik ruhunun və dövlətçiliyə sədaqətin təntənəsidir. O, həmçinin bildirib ki, qazanılmış Zəfər gələcək nəsillər üçün vətənə xidmət nümunəsi kimi əbədiləşəcəkdir. Ailə, Qadın və Uşaq Problemləri üzrə Dövlət Komitəsinin sədri Bahar Muradova çıxışı zamanı bildirib ki, Azərbaycan gəncliyi müstəqillik dövründə böyüyən, Zəfərin övladları sayılan nəsildir. O qeyd edib ki, gənclər qalib xalqın davamçıları kimi gələcək fəaliyyətlərini bu gücün və məsuliyyətin üzərində qurmalıdırlar. 2020-ci ilin payızında başlayan Vətən müharibəsi Azərbaycan xalqının və dövlətinin birliyinin, liderlik və peşəkarlığın ən parlaq nümunəsinə çevrildiyini vurğulayan sədr, Zəfərdən dərhal sonra sülh quruculuğu prosesinin başlanması xalqımızın düşüncəsinin və uzaqgörənliyinin göstəricisi olduğunu əlavə edib. O qeyd edib ki, Yeni Azərbaycan Partiyası bütün bu illər ərzində Ulu Öndər Heydər Əliyev ideyalarına əsaslanaraq ölkədə gedən ictimai-siyasi proseslərdə fəal iştirak edib və bu ideyaların həyata keçirilməsində aparıcı qüvvələrdən olub. B.Muradova vurğulayıb ki, Azərbaycanın inkişaf yolu davam edir və bu yol ata-babalarımızdan, bugünkü tərəfdaşlarımızdan, sabahkı gənclikdən keçərək gələcəyə uzanır və bu əlaqə heç vaxt qırılmayacaq, bu irs hər zaman möhkəm qalmalıdır. Hər bir kəsin Zəfərdən doğan qürur hissi ilə yanaşı, onun qorunmasına, gələcək nəsillərə ötürülməsinə və bu zəfərdən doğan öhdəliklərin yerinə yetirilməsinə töhfə verməli olduğunu vurğulayan sədr, gənclərə milli-mənəvi dəyərlərə sadiq qalmağı, öz sahələrində peşəkar mütəxəssislər olmağı, gələcək nəsillərə örnək olacaq sağlam ailələr qurmağı, milli ruhda övladlar böyütməyi tövsiyə edib. Milli Məclisin deputatı Azər Allahverənov çıxışında bildirib ki, Azərbaycanın tarixi Zəfərindən sonra artıq beş ildir ki, bu günləri böyük qürur hissi ilə qeyd edirik. A.Allahverənov həmçinin vurğulayıb ki, bu qələbə regionda yeni reallıqlar yaradıb və qarşımızda yeni çağırışlar formalaşıb. O qeyd edib ki, 44 gün davam edən müharibə nəticəsində Azərbaycan dünyaya öz hərbi, siyasi və diplomatik gücünü nümayiş etdirməklə yanaşı, yeni bir Azərbaycan modeli də təqdim olundu. Qeyd olunub ki, otuz ilə yaxın davam edən işğal dövrü Azərbaycan xalqının milli yaddaşında dərin izlər buraxsa da, bu müddət ərzində dövlətin məqsədyönlü və prinsipial siyasəti gələcək Qələbənin əsasını qoydu. O, çıxışının sonunda gənclərə bu tarixi Zəfəri daim yaşatmağı, şəhidlərimizin qəhrəmanlığını unutmamağı və Vətənə sədaqətlə xidmət etməyi tövsiyə edib. “Yeni Azərbaycan Partiyası Gənclər Birliyi”nin sədr müavini Sevinc Qasımova qeyd edib ki, Azərbaycan əsgəri əsl qəhrəmanlıq, mərdlik, şücaət, rəşadət nümunəsi göstərdi. Düşmənin 30 il ərzində qurduğu, milyonlarla vəsait sərf etdiyi nəhəng istehkamlar qısa müddətdə darmadağın edildi, müzəffər ordumuzun tətbiq etdiyi savaş strategiyası müasir hərb tarixinə yeni örnək oldu. Zəfərin xalqımızın genetik kodunda yer alan qəhrəmanlıq və mübarizlik ruhunun təcəssümü olduğunu qeyd edən S.Qasımova bildirib ki, biz öz tariximizin birbaşa yazıçılarıyıq və gənclərin əsas vəzifəsi bu ruhu qoruyaraq, beynəlxalq arenalarda Azərbaycanın səsini ucaldıb, həqiqətlərimizi dünyaya çatdırmaqdır. Vətən müharibəsi iştirakçısı Vüqar Muradov vurğulayıb ki, bu zəfər Azərbaycan xalqının tarixi nailiyyəti, əbədi fəxarətidir. Bu, böyük hərbi zəfərin və müdrik diplomatiyanın nəticəsidir. Sonda 8 Noyabr – Zəfər Gününə həsr olunmuş sərgiyə baxış keçirilib.
“Ailə, qadın və uşaq məsələləri media müstəvisində: çağırışlar və perspektivlər” mövzusunda konfrans keçirildi
Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Konstitusiya və Suverenlik İli” çərçivəsində Azərbaycan milli mətbuatının 150 illik yubileyinə həsr olunmuş “Ailə, qadın və uşaq məsələləri media müstəvisində: çağırışlar və perspektivlər” mövzusunda konfrans keçirilib. Ailə, Qadın və Uşaq Problemləri üzrə Dövlət Komitəsinin sədri Bahar Muradova çıxış edərək bildirib ki, bu ilin əvvəlində ölkə daxilində və xaricində Azərbaycan mətbuatının tarixi əhəmiyyəti, onun Şərq və İslam dünyasının ən qabaqcıl ideyalarına müəlliflik etmiş bir ənənənin davamı kimi formalaşması, eləcə də ötən dövr ərzində əldə etdiyi nailiyyətlər xüsusi vurğulanıb. “Mətbuat cəmiyyətin aynasıdır” — deyən Komitə sədri vurğulayıb ki, media cəmiyyətin problemlərini görən, onları qeydə alan, şərh edən, qiymətləndirən və gələcək perspektivlər barədə fikir bildirən bir gücdür. O əlavə edib ki, mətbuat təkcə yazılmış əsərləri oxuyanlar və yazanlardan ibarət deyil, bütöv cəmiyyətin həyatını özündə əks etdirən bir sferadır. Bahar Muradova qeyd edib ki, elə bir hadisə yoxdur ki, o, cəmiyyətin, insanın və ya dövlətin həyatında baş versin, amma mətbuatın güzgüsündə əks olunmasın. Məhz buna görə bu güzgü həmişə saf və aydın olmalıdır. Mətbuat cəmiyyət həyatını olduğu kimi göstərməklə yanaşı, nə vaxt və necə göstərməyin vacibliyini də düşünməlidir. Məhz bu baxımdan Azərbaycan mətbuatının 150 illiyi münasibətilə keçirilən bu toplantı çox böyük mənəvi və ictimai əhəmiyyət daşıyır: “Biz bu il müxtəlif formatlarda bir araya gələrək dövlətimizin müstəqilliyi, suverenliyi və qazandığımız qələbələr barədə fikir mübadiləsi aparmış, bu nailiyyətləri təbliğ etmişik. Qələbəmizlə fəxr etmiş, eyni zamanda onun məsuliyyətini dərk etmişik. Biz düşünməliyik ki, necə etməliyik ki, əldə etdiyimiz bu zəfər davamlı olsun, qəhrəmanlığımız, milli dəyərlərimiz və suverenliyimiz həyatımızın bütün istiqamətlərinə işıq saçsın.” – deyə o əlavə edib. Bahar Muradova bildirib ki qadın və uşaq hüquqlarının mətbuat vasitəsi ilə elmi nəticələr, təhlillər, tədqiqatlar vasitəsi ilə ortaya qoyulması, çıxış yollarının axtarılması, problemlərin həlli üçün səylərin birləşdirilməsi çox vacibdir. Bu günki tədbirdə çıxış edən hər bir natiq və ekspert gələcəyə yönəlik perspektivlər barədə dəyərli fikirlərini bölüşəcəklər. Tədbir BMT-nin CEDAW Komitəsinin üzvü Elgün Səfərovun moderatorluğu ilə keçirilən panel sessiya ilə davam edib. O, XXI əsrdə süni intellektin inkişaf meyarları, həmçinin ənənəvi və sosial medianın bir-biri ilə kəsişdiyi nöqtələrdə meydana çıxan problemlər, boşluqlar və inkişaf istiqamətləri barədə danışıb. E. Səfərov vurğulayıb ki, bu gün ailə və dəyərlər anlayışı cəmiyyətin mərkəzində dayanır. Azərbaycan dəyərlərinin əsası ailədən başlayır və məhz bu dəyərlər üzərində cəmiyyətin mənəvi dayaqları formalaşır. O, qeyd edib ki, qadın və uşaq hüquqlarının müdafiəsi, onların sosial və iqtisadi həyatda fəal iştirakının təmin olunması ölkənin davamlı inkişafının vacib şərtlərindəndir. Milli Məclisin deputatı Hikmət Babaoğlu medianın milli-mənəvi kimliyin qorunmasında mühüm təsir gücünə malik olduğunu vurğulayaraq, mətbuatın yalnız məlumat ötürmə vasitəsi deyil, həm də dəyərlərin formalaşmasında, sosial məsuliyyətin artırılmasında, milli-mənəvi kimliyin qorunmasında əhəmiyyətli rol oynadığını qeyd edib. O bildirib ki, Azərbaycan cəmiyyətində ailə institutunun möhkəmləndirilməsi, qadınların sosial fəallığının artırılması və uşaqların sağlam mənəvi mühitdə böyüməsi üçün aparılan işlər dövlət siyasətinin prioritet istiqamətlərindən biridir. Bu istiqamətdə medianın düzgün və obyektiv fəaliyyət göstərməsi, həm maarifləndirici, həm də təbliğat xarakterli materialların hazırlanması mühüm əhəmiyyət daşıyır. Azərbaycan Mətbuat Şurasının sədri Rəşad Məcid beynəlxalq və milli müstəvidə media vasitəsilə qadın və uşaqlara dair məsələlərin işıqlandırılmasında jurnalistlərin etik davranış qaydaları haqqında danışıb. O, media nümayəndələrinin maariflənməsi və həssaslığın artırılması istiqamətində həyata keçirilən tədbirlərin əhəmiyyətini qeyd edib. Eyni zamanda sosial medianın gücünü vurğulayaraq, qeyd edib ki, blogerlər və sosial media fəalları da ənənəvi media nümayəndələri kimi məsuliyyətli olmalı, qadın və uşaqlarla bağlı mövzulara həssas yanaşmalı, məlumat paylaşarkən etik prinsiplərə riayət etməlidirlər. R.Məcid süni intellekt, texnologiya və rəqəmsallaşma dövründə medianın qarşısında yeni çağırışların yarandığını da qeyd edərək, jurnalistlərin müasir texnologiyalardan düzgün şəkildə yararlanmasını vacibliyini vurğulayıb. Azərbaycan Televiziyasının Teleradio Akademiyasının rektoru Almaz Mahmud media savadlılığının önəmini vurğulayıb. O, qeyd edib ki, hətta peşəkar jurnalistlər belə bəzən sosial mediada səhvlərə yol verirlər və bu səbəbdən onlayn platformalarda da ənənəvi mediada olduğu kimi etik qaydalara ciddi şəkildə riayət olunmalıdır. Almaz Mahmud bildirib ki, xəbər paylaşarkən empatiya qurmaq, xüsusilə uşaq və qadınlarla bağlı mövzuları işıqlandırarkən məsuliyyətli və həssas yanaşmaq vacibdir. Bakı Dövlət Universitetinin Jurnalistika fakültəsinin dekanı Vüqar Əliyev çıxışında vurğulayıb ki, dəyərlərimizi qorumaq və yaşatmaq uğrunda mənəvi savaş aparmaq hər birimizin borcudur. Bu prosesdə medianın və media nəzəriyyəçilərinin üzərinə böyük məsuliyyət düşür. Onlar nəzəri və praktiki cəhətdən müasir kommunikasiya alətlərindən düzgün istifadə etməli, informasiya təhlükəsizliyi və media savadlılığının artırılmasına töhfə verməlidirlər.. Sosial media, vətəndaş jurnalistikası, informasiya ekosistemi və informasiya müharibəsi kimi anlayışlar hər bir fərdin diqqət mərkəzində olmalıdır. Bizə qarşı aparılan informasiya müharibəsinin görünməyən tərəfinin hədəf taxtasında qadın və uşaqlar durur.Buna görə də, medianın və ictimaiyyətin birgə səyi ilə bu sahədə həssaslıq və məsuliyyət daha da artırılmalıdır. Davamında Azərbaycanın ilk qadın mətbuatı kimi tarixə yazılan “İşıq” jurnalının baş redaktor müavini, MİMTA Yayımlarının direktoru Əsəd Aslanoğlu tərəfindən “1911-12-ci illərdə nəşr olunan “İşıq” qəzetinin transliterasiya edilmiş toplusu”nun təqdimat mərasimi keçirilib. Bildirilib ki, istər qadının ali dəyəri məsələsində, istər ailə dəyərləri, övlad tərbiyəsi mövzusunda, istərsə tariximizin qadın işığıyla aydınlanan səhifələrindən verdiyi örnəklərlə “İşıq” dünənlə bu gün arasındakı bir körpüyə çevrilib. Bununla paralel olaraq, Ailə Qadın və Uşaq Problemləri üzrə Dövlət Komitəsi ilə birgə layihəmiz olan tarixi “İşıq” qəzetini də transliterasiya etməyimizdə məqsəd, Azərbaycan qadınının nə qədər ülvi dəyərlərə sahib olduğunu bir daha göstərməkdir. MİMTA Fondunun icraçı direktoru Pərviz Əmirov çıxışında bildirib ki, Fond yarandığı gündən etibarən milli irsimizin, mədəni və tarixi dəyərlərimizin araşdırılması istiqamətində mühüm fəaliyyət göstərir. Fondun əsas məqsədlərindən biri əski əlifba üzrə mütəxəssisləri bir araya gətirməklə bu sahədə tədqiqatları genişləndirmək və milli mətbuat tariximizin zəngin irsini qorumaq, yeni nəsillərə milli mətbuatın başlanğıc mərhələlərini tanıtmaq və maarifçilik ənənələrini yaşatmaqdır.. O, həmçinin vurğulayıb ki, Azərbaycanın ilk uşaq jurnalı olan “Dəbistan”ın transliterasiyası istiqamətində işlər davam etdirilir. Daha sonra Azərbaycan milli mətbuatının 150 illik yubileyi münasibətilə jurnalistlər arasında elan edilmiş müsabiqənin qaliblərinin mükafatlandırma mərasimi keçirilib. Tədbirdə çıxış edən Bakı Dövlət Universitetinin Jurnalistika fakültəsinin dekan müavini, müsabiqənin münsiflər heyətinin üzvü Sevinc Əliyeva müsabiqəyə təqdim olunan yazıların qiymətləndirilməsi prosesindən bəhs edib. O, bildirib ki, təqdim edilən materiallar mövzuya yanaşma tərzi, peşəkarlıq səviyyəsi, etik prinsiplərə riayət, analitik düşüncə və dil üslubu baxımından diqqətlə qiymətləndirilib. “Ailə mövzularının işıqlandırılması üzrə ən yaxşı yazı” nominasiyası üzrə I yerin qalibi Təhminə Verdiyeva (azertag.az), II yerin qalibi Şəfiqə Məlikova (report.az), III yerin qalibi Liya Bayramova (media.az), həvəsləndirici yer olaraq Tünzalə Quliyeva (“Azərbaycan müəllimi” qəzeti), “Azərbaycanın işıqlı qadınları: ilhamverən hekayələr adlı videosüjet” nominasiyası üzrə isə Zeynəb Fərəczadə (AnewZ.tv) və Oruc Ələsgərov (Mədəniyyət TV) sertifikat və hədiyyələrlə təltif edilib. Yekunda Bahar Muradova qalibləri təbrik edərək, media nümayəndələrinə fəaliyyətlərində uğurlar arzu edib.
Dövlət Komitəsinin “Ailə, qadın və uşaq məsələləri Azərbaycan qanunvericiliyində” mövzusunda mətbuat konfransı keçirilib
4 noyabr 2025-ci il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradovanın “Ailə, qadın və uşaq məsələləri Azərbaycan qanunvericiliyində” mövzusunda mətbuat konfransı keçirilib. Media nümayəndələrini salamlayan Dövlət Komitəsinin sədri Bahar MuradovaKomitənin fəaliyyətində gündəlik olaraq mətbuatla işin əsas prioritet istiqamət olduğunu vurğulayıb. Bahar Muradova Dövlət Komitəsinin ailə, qadın və uşaq hüquqları sahəsində normativ-hüquqi bazanın təkmilləşdirilməsi üzrə fəaliyyəti, son illərdə qəbul edilən mühüm qanunvericilik aktları və dövlət proqramları barədə məlumat verib. Qeyd edib ki, Dövlət Komitəsi öz fəaliyyəti dövründə ailə institunun inkişafı və möhkəmləndirilməsi, ailələrin təhlükəsizliyi, uşaq hüquqlarının təmin edilməsinə dövlət nəzarətinin gücləndirilməsi, uşaqların informasiya təhlükəsizliyi və digər sahələr üzrə vacib təkliflərlə çıxış edib. Vurğulayıb ki, son illərdə bu sahələr üzrə 7 qanuna dəyişiklik edilib, 11 qayda və əsasnamə, 3 dövlət proqramı qəbul olunub. Qəbul edilmiş hüquqi sənədlərin ailə institutunun möhkəmlənməsinə, qadın və uşaqların hüquqlarının qorunmasına, cəmiyyətdə hüquq şüurunun artmasına mühüm töhfə verdiyini bildirən sədr əlavə edib ki, bu sənədlər cəmiyyətin hüquq şüurunun inkişafına, uzun illər formalaşmış, ayrı-seçkiliyə səbəb olan steriotiplərin əhəmiyyətli dərəcədə dəyişməsinə gətirib çıxardıb. Bahar Muradova bildirib ki, ölkəmizdə sosial siyasətin əsas və mühüm istiqamətlərindən biri, ilk növbədə, ailənin rifahının təmin olunmasıdır. Çünki ailə cəmiyyətin əsasıdır, bu ailədə fərdlər, şəxsiyyətlər yetişir, onlar sabahın müstəqil vətəndaşları olmalıdır: “Azərbaycan ailəsi milli kimliyini qorumalıdır, eyni zamanda müasir çağırışlara uyğun da yenilənməlidir”. Uşaq siyasəti sahəsində hüquqi islahatlardan danışan sədr, Azərbaycanda uşaq siyasətinin gücləndirilməsi və müasir dövrün tələblərinə uyğunlaşdırılması məqsədilə ölkə rəhbərinin müvafiq sərəncamları ilə “Azərbaycan Respublikasının Uşaqlara dair 2020–2030-cu illər üçün Strategiyası” və onun 2020–2025-ci illər üçün Fəaliyyət Planının təsdiq edildiyini diqqətə çatdırıb. Qeyd edib ki, Strategiyanın icrası ilə bağlı uşaq hüquqlarını müdafiə edən orqanların fəaliyyətində də müvafiq dəyişiklik oldu. Sədr, həmçinin Uşaqların zərərli informasiyadan qorunması sahəsində hüquqi islahatlar barədə media nümayəndələrinə ətraflı məlumat verib. Bahar Muradova, “Azərbaycan Respublikasında məişət zorakılığı ilə mübarizəyə dair 2020-2023-cü illər üçün Milli Fəaliyyət Planının icrasına 19 dövlət qurumunun cəlb olunduğunu və ümumilikdə yeddi istiqamət üzrə 32 tədbirin həyata keçirildiyini bildirib. O, yeddi əsas istiqamət üzrə görülən işlər nəticəsində 6 qanuna və 5 fərmana dəyişiklik edildiyini və bu prosesdə Komitənin mühüm rol oynadığını qeyd edib. Bahar Muradova diqqətə çatdırıb ki, qanunvericiliyin təkmilləşdirilməsi nəticəsində mühüm yeniliklər əldə olunub — “Məişət zorakılığının qarşısının alınması haqqında” Qanunun əhatə dairəsi genişləndirilib, “yaxın qohumlar” anlayışı isə daha dəqiq müəyyən edilib. B.Muradova, yetkinlik yaşına çatmayanların evliliyinin və bu məqsədlə keçirilən mərasimlərin qarşısının alınması məqsədilə qanunvericiliyə dəyişikliklər edildiyini, belə hallara görə inzibati və cinayət məsuliyyəti müəyyən olunduğunu vurğulayıb. Eyni zamanda, qohum nikahlarının qarşısının alınması məqsədilə Ailə Məcəlləsinə edilən dəyişiklikdən söz açaraq bildirib ki, bu sağlam ailə institutunun formalaşmasına və gələcək nəsillərin rifahının qorunmasına xidmət edir. Daha sonra erkən nikah və məişət zorakılığı hallarının qarşısının alınması, Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) çərçivəsində gələcək fəaliyyət, qarşıdakı dövrdə qadın və uşaq hüquqlarının müdafiəsi istiqamətində qəbul ediləcək sənədlər, qızların təhsili ilə bağlı layihələr, gender bərabərliyi, qanunvericiliyə edilmiş son dəyişiklər və digər aktual mövzular üzrə media nümayəndələri tərəfindən ünvanlanan suallar Komitə sədri tərəfindən cavablandırılıb. Mətbuat konfransı - Təqdimat
Naftalanda vətəndaş qəbulu keçiriləcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 14 noyabr 2025-ci il tarixində, saat 10:00-da Naftalan şəhəri Heydər Əliyev Mərkəzində vətəndaşları qəbul edəcək. Qəbulda Naftalan şəhəri, Goranboy və Xocalı rayon sakinlərinin müraciətlərinə baxılacaq.
Ailələrimizi tanıyaq layihəsinin növbəti qonağı Paşayevlər ailəsidir
Ailələrimizi tanıyaq” layihəsinin bugünkü qonağı Saatlı rayonundan olan, nümunəvi həyat tərzi ilə seçilən Paşayevlər ailəsidir. 54 ildir birgə ömür sürən Adil Paşayev və Sədaqət Zeynalovanın 4 övladı, 9 nəvəsi və 2 nəticəsi var.Hər ikisi də artıq təqaüddədir. Ailənin başçısı Adil Paşayev və həyat yoldaşı Sədaqət Zeynalova Saatlı rayonunda doğulublar. A.Paşayev Bakı Dövlət Universitetinin Kitabxanaçılıq ixtisasını bitirib. Saatlı rayon Mərkəzi Kitabxanasının və rayon Mədəniyyət Mərkəzinin direktoru, Saatlı Rayon İcra Hakimiyyətində Ərazi idarəetmə və yerli özünüidarəetmə orqanları ilə iş şöbəsinin müdiri vəzifələrində çalışıb. S. Zeynalova isə Bakı Dövlət Universitetinin filologiya fakültəsini bitirib və uzun illər Azərbaycan dili və ədəbiyyatı müəllimi kimi çalışıb. Adil Paşayev: “Ailə qurmaq sadəcə iki gəncin bir-birini fiziki olaraq bəyənməsi deyil, eyni zamanda sevmək, baş verə biləcək bütün çətinliklərə sinə gərmək, kənar müdaxilələrə yol verməməkdir. Məhz bunların sayəsində ailə uzunömürlü olur. Həyat varsa orada çətinliklər, enişli-yoxuşlu yollar, söz-söhbətlər də olacaq. Bu çətinlikləri məğrurluqla dəf edəndə, qocalıb geriyə baxanda görürsən ki, sən qalibsən, həyatın qalibi”. Sədaqət Zeynalova: “Biz çox böyük sevgi ilə ailə qurmuşuq və övladlarımızı bu sevgi ilə böyüdüb tərbiyə etmişik. Birlikdə keçirdiyimiz 54 ildə çox çətinliklərlə qarşılaşmışıq, amma danışaraq, güzəştə gedərək,bir-birimizi başa düşüb, həyatın hər bir çətinliyində əl-ələ verib xoşbəxt yuva qurmağı bacarmışıq”.
Bakı şəhərində və regionlarda növbəti “Açıq qapı” günü keçirilib
Ailə, Qadın və Uşaq Problemləri üzrə Dövlət Komitəsinin tabeliyində olan Şüvəlan, Ağdam, Saatlı, Sabirabad, Hacıqabul, Qəbələ, İsmayıllı, Goranboy, Göygöl, Zaqatala və Zərdab Uşaq və Ailələrə Dəstək Mərkəzləri tərəfindən 29 oktyabr 2025-ci il tarixlərində növbəti səyyar “Açıq qapı” günü keçirilib. Vətəndaşlarla görüş Bakı şəhərinin Pirallahı rayonu, Ağdam rayonunun Bənövşələr, Goranboy rayonunun Səfikürd, Hacıqabul rayonunun Atbulaq, Qəbələ rayonunun Topbağ, Saatlı rayonunun Varxan, Sabirabad rayonunun Minbaşı, Zaqatala rayonunun Əliabad, Zərdab rayonunun Dəkkəoba, Göygöl rayonunun Yeni Zod və İsmayıllı rayonunun Kəlbənd kənd və qəsəbələrini əhatə edib. Psixoloq və sosial işçilərin iştirakı ilə keçirilən görüşdə Mərkəzlərin xidmətlərindən istifadə, mərkəzlərlə əməkdaşlıq, psixoloji konsultasiya, aliment, boşanma, müalicə, sosial müavinətlər, işlə təmin olunma, təhsil ,yaşayış şəraitinin yaxşılaşdırılması və uşaqların inkişaf ləngiməsinin aradan qaldırılması kimi müraciətlər yer alıb. Uşaqlarda inkişaf ləngiməsinin erkən aşkarlanması və profilaktikası məqsədi ilə mərkəzlərin mütəxəssisləri tərəfindən Denver II qiymətləndirmə testi tətbiq olunub. “Açıq qapı” günündə ümumilikdə 87 nəfər vətəndaşın 94 mövzu üzrə müraciəti dinlənilib və problemlərinin həlli istiqamətində müvafiq dəstək göstərilib.
“Ailə, qadın və uşaq məsələləri mediada” mövzusunda təlim proqramı keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə ali təhsil müəssisələrinin jurnalistika ixtisası üzrə təhsil alan tələbələri üçün “Ailə, qadın və uşaq məsələləri mediada” mövzusunda təlim proqramı keçirilib. 29-31 oktyabr 2025-ci il tarixlərində Quba rayonunda baş tutan təlimin ilk günündə açılış nitqi ilə çıxış edən Dövlət Komitəsinin Analitik təhlil və informasiya təminatı şöbəsinin əməkdaşı Sevil Rəsulzadə bildirib ki, təlim “2024-2026-cı illər üzrə Ailə, Qadın və Uşaq Problemləri üzrə Dövlət Komitəsinin Kommunikasiya Strategiyası”nın tədbirlər planının icrası istiqamətində həyata keçirilir. Təlimin məqsədi jurnalistlərin, xüsusilə də media üzrə təhsil alan gənc kadrların ailə, qadın və uşaq problemlərinin mediada düzgün işıqlandırılması üzrə bilik və bacarıqlarının gücləndirilməsi, uşaq hüquqları və gender bərabərliyinə dair informasiyanın yayımlanmasında həssaslığın artırılmasıdır. Daha sonra “Ümidli Gələcək Sosial Təşəbbüslər” İctimai Birliyinin rəhbəri Kəmalə Aşumova təqdimatla çıxış edərək, medianın uşaq hüquqlarının qorunmasında və ictimai məlumatlılığın artırılmasında mühüm rol oynadığını vurğulayıb. O, jurnalistlərin uşaq mövzularına həssas yanaşmasının vacibliyini qeyd edərək, bu istiqamətdə beynəlxalq təcrübə və milli qanunvericilikdən irəli gələn prinsiplər barədə məlumat verib. Həmçinin mediada uşaqlarla bağlı məlumatların yayılması zamanı etik davranış qaydalarına riayət olunmasının, uşaqların şəxsiyyətinin və məxfiliyinin qorunmasının zəruriliyi xüsusi vurğulanıb. Eyni zamanda uşaqların kibertəhlükəsizliyi məqsədilə tövsiyələr diqqətə çatdırılıb. Təlimin növbəti günündə təşkilati inkişaf və gender məsələləri üzrə ekspert Məryəm Məcidova iştirakçıları gender bərabərliyi və gender-əsaslı ayrı-seçkilik mövzularında maarifləndirib. O, həmçinin Azərbaycanda gender-əsaslı cins seçiminin yaranma səbəbləri və onun sosial fəsadları barədə danışaraq, medianın gender bərabərliyinin təşviqində mühüm rolunu vurğulayıb. Təlim zamanı M. Məcidova gender-həssas jurnalistikanın cəmiyyətin inkişafına və bərabərlik prinsiplərinin möhkəmlənməsinə töhfə verən üstünlüklərindən də bəhs edib. Təlimin praktiki hissəsində iştirakçılar qrup işləri formatında müxtəlif situasiyaları təhlil edib, media materiallarında uşaq hüquqlarının qorunmasına və gender bərabərliyinin təmin edilməsinə dair nümunələri müzakirə ediblər. Eyni zamanda jurnalistlərin material hazırlayarkən ana dilinin qaydalarına düzgün riayət etmələri, etik prinsiplərə sadiq qalmaları və informasiya təqdimatında peşəkarlığı qoruyub saxlamalarının vacibliyi xüsusi vurğulanıb. Təlimin yekununda tələbələrə fəal iştiraka görə sertifikatlar təqdim edilib.