Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Dövlət Komitəsinin kollektivi və bir qrup ictimai fəal qadın Fəxri Xiyabanı ziyarət edib
Ulu Öndər Heydər Əliyev tərəfindən 6 mart 2000-ci il tarixində “Azərbaycan Respublikasında dövlət qadın siyasətinin həyata keçirilməsi haqqında” Fərmanın imzalanmasının 25-ci ildönümü və 8 Mart - Beynəlxalq Qadınlar Günü ilə əlaqədar Ailə, Qadın və Uşaq Problemləri üzrə Dövlət Komitəsinin kollektivi və bir qrup ictimai fəal qadın Fəxri Xiyabanı ziyarət edib. Azərbaycan xalqının Ümummilli lideri Heydər Əliyevin və görkəmli oftalmoloq alim, akademik Zərifə xanım Əliyevanın xatirəsinə dərin ehtiram ifadə olunub, məzarı önünə gül dəstələri düzülüb.
8 Mart - Beynəlxalq Qadınlar Gününə həsr olunmuş tədbir keçirilib
5 mart 2025-ci il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə 8 Mart - Beynəlxalq Qadınlar Gününə həsr olunmuş tədbir keçirilib. Tədbir Azərbaycan Respublikasının Dövlət Himninin səsləndirilməsi ilə başlayıb. Ərazi bütövlüyümüz uğrunda canından keçən Vətən övladlarının və AZAL-a məxsus təyyarənin qəzaya uğraması nəticəsində həlak olanların xatirəsi bir dəqiqəlik sükutla yad edilib. Sonra Azərbaycan dövlətinin inkişaf tarixi, qadınların dövlətin ictimai-siyasi həyatında və cəmiyyətdə rolu barədə qısametrajlı film nümayiş etdirilib. Tədbir Azərbaycan Respublikası Prezidenti Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyevanın Prezident cənab İlham Əliyevin qadınlara təbrik məktubunu səsləndirməsi ilə davam edib. Açılış nitqi ilə çıxış edən Dövlət Komitəsinin sədri Bahar Muradova, ölkə Prezidenti cənab İlham Əliyevə Azərbaycan qadınlarına ünvanladığı təbrik məktubuna görə təşəkkürünü bildirib, 8 Mart - Beynəlxalq Qadınlar Günü münasibətilə bütün qadınları təbrik edib və bu əlamətdar günün qadınlarımızın dövlət və cəmiyyət həyatındakı rolunu, ailədəki əvəzsiz zəhmətini və fədakarlığını vurğulamaq üçün bir fürsət olduğunu qeyd edib. O, ölkə prezidenti cənab İlham Əliyevin sərəncamı ilə bu ilin “Konsitusiya və Suverenlik İli” elan edilməsinin dövlətçilik ənənələrimizin möhkəmlənməsinə, əldə etdiyimiz nailiyyətlərin dünya ictimaiyyətinə daha geniş təqdim edilməsinə xidmət etməklə yanaşı, dövlət orqanları və vətəndaş cəmiyyəti, o cümlədən onun fəal hissəsi olan qadınlar qarşısında yeni və vacib vəzifələr qoyduğunu bildirib. Əlavə edib ki, gələcək nəsillərə çiçəklənən, güclü və qüdrətli bir Azərbaycan bəxş etmək üçün ölkə rəhbərliyinin uğurlu dövlət idarəçiliyi, davamlı sosial-iqtisadi proqramlar, dünya iqtisadi sisteminə çevik inteqrasiya, müstəqil xarici siyasət Azərbaycanı regionda lider dövlətə çevirmişdir. Bütün bu nailiyyətlər qadınların fəal iştirakı ilə əldə edilir, həmçinin daha güclü və yüksək səriştəli insan kapitalının formalaşmasına böyük töhfə verir. Qadınların dövlət qulluğu, hakimlik, qanunverici və hüquq-mühafizə orqanlarında və vəkillər arasında sıralarını daha da genişləndirdiklərini vurğulayan B. Muradova, qadınların informasiya texnologiyaları və süni intellektə marağının da artdığını, ölkəmizdə qadınların təhsil, sahibkarlıq və əmək bazarına çıxışı son illərdə daha əlçatan olduğunu bildirib. Bir çox taleyüklü məqamlarda məhz qadınların daxili humanizmi ilə sülh və barış missiyalarını üzərlərinə götürməklə, həmrəyliyə və tərəqqiyə xidmət edən böyük təşəbbüslərin müəllifinə çevrildiyini qeyd edən Komitə sədri, Azərbaycanın fədakar qadınlarının regionda sülhün, əmin-amanlığın əldə edilməsinə və Azərbaycan prezidentinin sülh naminə siyasətinə dəstək verməkdə davam etdiyini deyib. B. Muradova, ötən ilin xalqımızın həyatında bir neçə istiqamət üzrə əlamətdar olduğunu diqqətə çatdıran B. Muradova, Milli Məclisə seçkilər və Prezident seçkilərinin, eləcə də COP29 kimi mötəbər tədbirin uğurla baş tutduğunu qeyd edib. O əlavə edib ki, ölkəmizdə ailə, qadın və uşaq məsələləri sahəsində dövlət siyasətinin həyata keçirilməsi və bu işə cavabdeh qurumlar arasında əlaqələndirmə, bəzi hallarda monitorinq funksiyasını yerinə yetirməyə cavabdeh mərkəzi icra hakimiyyəti orqanı olmaqla Dövlət Komitəsi də ötən il sadalanan bütün fəaliyyət sahələri üzrə qadınların iştirakçılığının təmin olunması üçün tərəfdaşları ilə birlikdə böyük səylər göstərdi. Komitə rəsmisi xüsusilə diqqətə çatdırıb ki, Azərbaycan qadınlarının parlaq lideri ölkədə və dünyada hər kəsin hörmət və sevgisini qazanmış Birinci vitse-prezident və Heydər Əliyev Fondunun Prezidenti Mehriban xanım Əliyevanın timsalında hamisi olan qadınlarımız onun açdığı yolla ictimai-sosial, mədəni-mənəvi sahədə ölkəmizin inkişafına töhfə verməkdə davam edirlər. Onun Qarabağ və Şərqi Zəngəzurda aparılan bərpa və quruculuq işlərinə, ümumilikdə ölkəmizin hərtərəfli tərəqqisinə verdiyi töhfələr, bütün Azərbaycan qadınlarına, xalqa, dövlətə xidmət, ailəsinə sonsuz bağlılıq, sevgi və sədaqət hisslərindən qaynaqlandığını təlqin edir. B.Muradova, Azərbaycan qadınlarının qarşıdakı illərdə də cəmiyyətin yüksəlişinə ahəngdarlıq qazandıran dolğun sosial- mədəni fəaliyyətləri ilə parlaq gələcəyimiz naminə quruculuq işlərində yaxından iştirak edəcəyinə və müstəqillik salnaməmizə yeni, işıqlı səhifələr yazacağına inamını ifadə edib. Milli Məclisin sədrinin birinci müavini Əli Əhmədov qeyd edib ki, vətəndaşlarımızın, eləcə də qadınların hüquq və azadlıqlarının təmin olunmasının əsasını təşkil edən Azərbaycan Respublikası Konstitusiyasının qəbul edilməsi ilə xalqımıza xas olan qadına hörmət mənəvi kateqoriyadan hüquqi müstəviyə keçirildi, hüquqi status aldı. O bildirib ki, cəmiyyətdə əmin-amanlığın, təhlükəsizliyin, sabitlik və sülhün təmin olunmasında qadınların böyük rolu vardır. Həyatın bütün sferalarında qadınlar iştirak edərək, cəmiyyətin və dövlətin inkişafına töhfə verirlər: “Azərbaycan cəmiyyətini qadın istirakçılığından ayrı təsəvvür etmək mümkün deyil. Bütün sahələrdə, o cümlədən idarəçilikdə və iqtisadiyyatda qadın iştirakçılığının artması Azərbaycanın potensialının yüksəlməsində ən başlıca amillərdən biridir. İnanıram ki, hər bir vətəndaşımızın, o cümlədən qadınların fəallığı və vətənpərvərliyi sayəsində Azərbaycanın daha böyük nailiyyətlər əldə edəcəkdir". Azərbaycanda 1-ci dərəcəli Rəşadət ordeni ilə təltif edilən ilk qadın Aydan Rəhimli çıxış edib. O nitqi zamanı, bugünkü kürsüdəki çıxışını möcüzə adlandıraraq, həmkarlarının, eləcə də Hökumə Əliyevanın etdiklərinin qəhrəmanlıq və fədakarlıq nümunəsi olduğunu deyib: “Bəzən həyat bizi gözlənilməz sınaqlarla üz-üzə qoyur. O anda biz içimizdəki gücü, iradəni hiss edirik. Amma birlikdə çalışdığın əməkdaşları itirmək çox ağırdır". O, ölümlə üz-üzə qaldığı zaman güclü olduğunu hiss etdiyini vurğulayaraq, Azərbaycan qadınlarının zərif olduqları qədər hər zaman güclü olduğunu qeyd edib. A. Rəhimli xüsusi diqqət və qayğıya görə cənab Prezidentə, eləcə də həyatda qalmağında rolu olan həkimlərə və anasına təşəkkürünü bildirib. Rəsmi hissədən sonra tədbir bədii proqram ilə davam edib.
Gənclərin məşğulluq imkanları mövzusunda təlim keçirildi
4 mart 2025-ci il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı, Elm və Təhsil Nazirliyinin dəstəyi ilə tələbələrin aktiv məşğulluq tədbirlərinə cəlb edilməsi məqsədilə Azərbaycan Dövlət İqtisad Universitetində görüş keçirilib. Görüşü giriş sözü ilə açan Azərbaycan Dövlət İqtisad Universitetinin İnzibati və təşkilati məsələlər üzrə prorektoru Şaiq Əsgərov tələbələri salamlayaraq, görüşün əhəmiyyətindən danışıb. Daha sonra Dövlət Komitəsinin Ailə problemləri şöbəsinin baş məsləhətçisi Rafiq Mahmudov iş axtarışının düzgün aparılması, o cümlədən işaxtaran və işsiz şəxslərin, gənc ailələrin sosial müdafiəsi məqsədilə “İşə düzəlməkdə çətinlik çəkən şəxslər üçün faydalı məsləhətlər” adlı təqdimatla çıxış edib. Görüş zamanı “Ailəm könüllüləri” proqramının iştirakçısı Gülgün Şəfiyeva “Linkedİn nədir və ondan düzgün istifadə etmə qaydaları” adlı təqdimat ilə çıxış edərək internet platformasının karyera inkişafında rolu və faydaları barədə məlumat verib. Yekunda mövzu ətrafında müzakirələr aparılıb.
Qızların təhsilinə dəstək layihələri uğurla davam edir
Sevindirici haldır ki, elmə, təhsilə, qızların inkişafına, qadınların bərabər hüquqlarının təmin olunmasına, eləcə də tələbələrin motivasiyasına xidmət edən bu təşəbbüs getdikcə daha geniş vüsət alır, layihəyə töhfə vermək istəyən insanları bir araya gətirir. Milli Məclisin deputatı Fariz İsmayılzadənin təşəbbüsü və ADA Universitetinin müəllimlərinin iştirakı ilə Lənkəranda qızlar üçün ödənişsiz bacarıq inkişafı təlimləri keçirilir. Ali və ya orta ixtisas təhsil müəssisələrində təhsil alan və ya məzun olmuş qız tələbələr üçün proqramlaşdırma və kodlaşdırmanın əsasları, maliyyə, sosial media və marketinq, layihə idarəetməsi və turizm işi mövzularında proqram ADA Universitetinin müəllimləri tərəfindən keçirilir. İştirakçılar artıq ilk həftələrdən proqramın verdiyi imkanları yüksək qiymətləndirir və əldə etdikləri biliklərin gələcək karyeralarına mühüm töhfə verəcəyini bildirirlər. İştirakçılar əmək bazarının tələblərinə uyğun bilik və bacarıqlar qazanır. Əsas məqamlardan biri də odur ki, təlimləri uğurla bitirən iştirakçıların CV-ləri iri holdinq və şirkətlərin insan resursları şöbələri ilə paylaşılacaq, beləliklə onların məşğulluq imkanları genişləndiriləcəkdir. Lənkəranda Təhsil İnkişaf Fondu ilə birlikdə qızlar üçün təqaüd proqramı da təqdim edilib. Qeyd edək ki, Ailə, Qadın və Uşaq Problemləri üzrə Dövlət Komitəsi tərəfindən ölkəmizin gələcək inkişafı naminə gənclərin bərabər imkanlar çərçivəsində təhsil almasının vacib olmasını nəzərə alaraq 2021-ci ildən başlayaraq “Gənc Qızların Təhsilinə Dəstək” Kampaniyasına start verilmişdir. Daha sonra layihənin davamlılığının təmin edilməsi məqsədilə AR Elm və Təhsil Nazirliyi və Dövlət Komitəsi arasında niyyət protokolu imzalanmış, “Hənifə Məlikova – Zərdabi adına qızların təhsilinə dəstək” təqaüd proqramı təsis olunmuşdur. Layihənin həyata keçirildiyi müddət ərzində 58 rayon üzrə 144 tələbə qız, 27 fərqli ali təhsil müəssisəsinə qəbul olunub. Hər kəsi dövlətimizin inkişafında gənclərin, xüsusilə qızların rolunun artırılmasını təşviq etmək məqsədilə həyata keçirilən bu təşəbbüsə qoşulmağa dəvət edirik.
Regionlarda növbəti “açıq qapı” günü keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, Qəbələ, Goranboy, Göygöl, Zaqatala, Zərdab Uşaq və Ailələrə Dəstək Mərkəzləri (UADM) tərəfindən psixoloq və sosial işçilərin iştirakı ilə 27 fevral 2025-ci il tarixində növbəti “açıq qapı” günü keçirilib. Bakı şəhəri Xəzər rayonunun Şağan, Ağdam rayonunun Üçoğlan, Goranboy rayonunun Qaradağlı, Hacıqabul rayonunun Qızılburun, Qəbələ rayonunun Xırxatala, Saatlı rayonunun Qara Nuru, Sabirabad rayonunun Cavad, Zaqatala rayonunun Yuxarı Çardaxlar, Zərdab rayonunun Məmmədqasımlı kənd və qəsəbələrində səyyar şəkildə keçirilən “açıq qapı” günündə mərkəzlərin xidmətlərindən istifadə, psixoloji konsultasiya, qəyyumluq, müalicə, sosial müavinətlər, işlə təmin olunma, özünüməşğulluq proqramı, məişət şəraitinin yaxşılaşdırılması, əlil arabası və məktəbli ləvazimatları ilə təmin olunmaqla bağlı müraciətlər yer alıb. Həmçinin, uşaqların inkişaf ləngiməsinin erkən aşkar edilməsi və profilaktikası məqsədilə mərkəzlərin əməkdaşları tərəfindən Denver II qiymətləndirmə testi keçirilib. “Açıq qapı” günündə vətəndaşların müraciətləri dinlənilib, onların həlli istiqamətində müvafiq dəstək göstərilib.
Bahar Muradova Xaçmazda vətəndaşları qəbul edib
Ailə, Qadın və Uşaq Problemləri üzrə Dövlət Komitəsinin sədri Bahar Muradova Xaçmazda vətəndaşları qəbul edib 3 mart 2025-ci il tarixində keçirilən qəbul zamanı Xaçmaz və Şabran rayon sakinlərinin müraciətləri dinlənilib. Qəbuldan öncə Ümummilli Lider Heydər Əliyevin xatirəsi ehtiramla yad edilərək, abidəsi önünə gül dəstələri qoyulub. Dövlət Komitəsinin aidiyyəti struktur bölmə rəhbərinin də iştirakı ilə keçirilən görüşdə vətəndaş müraciətləri sırasında alimentin ödənilməsi, sosial yardım, işlə təmin olunma, müalicə, əmlak bölgüsü və digər məsələlər yer alıb. Qaldırılan məsələlərin hərtərəfli öyrənilməsi və qısa müddətdə həll edilməsi üçün müvafiq tapşırıqlar verilib. Həlli araşdırma tələb edən müraciətlər qeydə alınaraq, icraata götürülüb. Qeyd edək ki, görüş mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən keçirilib.
Ailə siyasətinin həyata keçirilməsi istiqamətində yaradılan İşçi Qrupun ilk iclası keçirildi
Ailə siyasətinin həyata keçirilməsi istiqamətində işlərin effektivliyinin və qurumlararası koordinasiyanın gücləndirilməsi məqsədilə yaradılan İşçi Qrupun 28 fevral 2025-ci il tarixində ilk iclası keçirilib. İclas iştirakçılarını salamlayan Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, müasir dövrdə milli kimlik məsələləri, milli-mənəvi dəyərlər və ailə dəyərlərinə zidd olan proseslər qarşımıza ciddi çağırışlar qoyur. Ailə cəmiyyətin nüvəsi və əsasıdır deyən B. Muradova, Azərbaycan ailəsinin mövcud iqtisadi, sosial, maddi imkanlardan, resurslardan istifadə edərək inkişaf etməsi və müasirləşməsi, hüquqlarının qorunması və təhlükəsizliyinin təmin olunmasının dövlətin qarşısında duran vacib istiqamətlərdən olduğunu vurğulayıb. O bildirib ki, ailə, cəmiyyət və dövlət arasında əlaqə müxtəlif istiqamətli olmalıdır və yekun nəticədə bütün səylər bir araya gəlməlidir: “Biz qarşılıqlı əlaqəni elə təmin etməliyik ki, ailədə formalaşan uşaq dövlətin də qarşısında vətəndaş kimi cavabdeh olduğunu düşünsün. Biz bütün hərəkətlərimizlə ailəmizə, cəmiyyətə və dövlətə xidmət etdiyimizi unutmamalıyıq”. Azərbaycan ailə institutunun tarixinə nəzər salan sədr, Ümummilli lider Heydər Əliyevin, eləcə də onun siyasi xəttini davam etdirən cənab Prezident İlham Əliyevin dövlət siyasətində ailə məsələlərinə xüsusi yer verdiyini, belə məsələlərə cavab verərkən tutduğu mövqe, ümumilikdə ailə dəyərləri ilə bağlı mövqeyinin dəyişməz olduğunu xatırladıb. O, hər bir qurumun öz səlahiyyətləri çərçivəsində ailə dəyərlərinin qorunması və möhkəmləndirilməsi prosesinə töhfə verdiyini qeyd edərək, təklif və tövsiyələrini səsləndirib. Daha sonra çıxış edən Dövlət Komitəsi sədrinin müavini Aynur Sofiyeva bildirib ki, ailə dəyərləri və milli dəyərlərin qorunması dövlət və vətəndaş olaraq, hər kəsin qarşısında duran prioritet məsələlərdəndir. Cəmiyyətin təməli olan ailənin qorunması istiqamətində institusional, sosial-iqtisadi tədbirlərin görülməsinə baxmayaraq, ənənəvi və milli-mənəvi dəyərlərə əsaslanan ailə institutunun son zamanlar möhkəmliyinə təsir edən amillərlə qarşılaşdığını diqqətə çatdıran A. Sofiyeva, dövlət ailə siyasəti konsepsiyasının və cavabdeh qurumları əhatə edən tədbirlər planının hazırlanmasının mühüm əhəmiyyət kəsb etdiyini qeyd edib. O, ənənəvi və müasirliyin sintezi fonunda ailə dəyərlərini qoruyaraq irəli aparmaq yolunda birgə fəaliyyətin gücləndirilməsinin vacibliyini vurğulayıb. İşçi Qrupunun üzvləri kimi iclasda iştirak edən Daxili İşlər Nazirliyi, Elm və Təhsil Nazirliyi, Ədliyyə Nazirliyi, Əmək və Əhalinin Sosial Müdafiəsi Nazirliyi, Gənclər və İdman Nazirliyi, Mədəniyyət Nazirliyi, Səhiyyə Nazirliyi, Dövlət Statistika Komitəsi, Dini Qurumlarla İş üzrə Dövlət Komitəsi, TƏBİB və Medianın İnkişafı Agentliyinin nümayəndələri genofondun qorunmasına cavabdehlik daşıyan, sosial və mənəvi əminliyi təmin edən ailələrdə münasibətlərin qorunması, bu istiqamətdə preventiv, məqsədyönlü və sistemli tədbirlərin həyata keçirilməsi, qarşıda duran məqsədlərin təkmilləşdirilməsi istiqamətində təkliflərini səsləndiriblər. Müzakirələr zamanı məişət zorakılığına qarşı mübarizənin gücləndirilməsi, ailə planlaşdırılması məsələsinin önə çəkilməsi, reproduktiv sağlamlıq sahəsində bilik səviyyəsinin artırılması, mediasiya prosesində barışıq sazişlərinin əldə olunmasına səylərin gücləndirilməsi, boşanmaların artmasına təsir edən obyektiv və subyektiv səbəblərin təhlilinə əsasən bu sahədə mənfi tendensiyanın qarşısının alınması istiqamətində tədbirlərin gücləndirilməsi, din amilinin mühüm təsirini nəzərə alaraq, bu istiqamətdə proqram və tədbirlərin intensiv təbliği ilə ziyanlı ideologiyaların qarşısının alınması, gənc ailələrlə görüşlərə ziyalıların cəlb edilməsi və digər mühüm məsələlər diqqətə çatdırılıb.
“Məişət zorakılığının qarşısının alınması sahəsində monitorinq və əlaqələndirmə qrupu”nun ilk iclası keçirilib
28 fevral 2025-ci il tarixində Azərbaycan Respublikasının Nazirlər Kabinetinin Qərarı ilə Ailə, Qadın və Uşaq Problemləri üzrə Dövlət Komitəsində yaradılan “Məişət zorakılığının qarşısının alınması sahəsində monitorinq və əlaqələndirmə qrupu”nun ilk iclası keçirilib. Açılış nitqi ilə çıxış edən Dövlət Komitəsinin sədri Bahar Muradova, məişət zorakılığı ilə mübarizə istiqamətində fəaliyyətin Komitənin əsas hədəflərindən biri olduğunu qeyd edib. B.Muradova “Məişət zorakılığının qarşısının alınması haqqında Qanun”un qəbul olunmasından etibarən Dövlət Komitəsinin davamlı olaraq dövlət qurumlarının səlahiyyətləri çərçivəsində onlarla əməkdaşlıq etdiyini, həmçinin beynəlxalq təşkilatların bir sıra layihələrində iştirak etməklə bu ağır problemin öhdəsindən gəlməyə, eyni zamanda zərərçəkmişlərə vaxtında və müxtəlifyönümlü yardım göstərməyə çalışdığını bildirib. B.Muradova Qanunun qəbulundan keçən müddət ərzində əladə edilən təcrübənin bir sıra istiqamətlərdə qanunvericilik təşəbbüsləri ilə çıxış etmək imkanı yaratdığını qeyd edib. Daha öncə effektiv əlaqələndirmə mexanizmlərin yaradılması çağırışlarına cavab olaraq, Komitənin təklifi ilə yerli icra hakimiyyəti yanında gender zorakılığı və uşaqlara qarşı zorakılıq üzrə monitorinq qruplarının yaradıldığını diqqətə çatdıran sədr, ictimai əsaslarla fəliyyət göstərən, səlahiyyət və öhdəliklərinin konkret çərçivələri müəyyən edilməyən bu təsisatların fəaliyyətinin dayanıqlı və hərtərəfli olmadığını deyib. O, yeni bir mexanizmin yaradılması ilə bağlı “Məişət zorakılığının qarşısının alınması haqqında” Azərbaycan Respublikasının Qanununa ötən il edilən dəyişikliklərə əsasən Dövlət Komitəsində və bütün yerli icra hakimiyyətləri yanında məişət zorakılığının qarşısının alınması sahəsində monitorinq və əlaqələndirmə qruplarının (MƏQ) yaradıldığını bildirib. “Məişət zorakılığının qarşısının alınması sahəsində monitorinq və əlaqələndirmə qruplarının fəaliyyət Qaydası”ndan irəli gələn məsələlər barədə məlumatı diqqətə çatdıran Dövlət Komitəsinin sədr müavini, Komitədə yaradılan Məişət zorakılığının qarşısının alınması sahəsində monitorinq və əlaqələndirmə qrupunun sədri Sədaqət Qəhrəmanova bildirib ki, Dövlət Komitəsində və bütün yerli icra hakimiyyətləri orqanlarında tərkibi azı 9 nəfərdən ibarət olmaqla Məişət zorakılığının qarşısının alınması sahəsində monitorinq və əlaqələndirmə qrupları yaradılıb. Sədr müavini Dövlət Komitəsi tərəfindən yaradılan MƏQ-in tərkibi barədə məlumat verib, qrupun əsas fəaliyyət istiqamətlərindən danışıb. Qeyd edib ki, MƏQ məişət zorakılığının qarşısının alınması sahəsində qurumlararası əlaqələndirmənin həyata keçirilməsi, məişət zorakılığına qarşı cavab tədbirlərinin monitorinqinin aparılması, əhali arasında maarifləndirmə tədbirlərinin keçirilməsi, eləcə də məişət zorakılığından zərər çəkmiş şəxsin və onun himayəsində olan yetkinlik yaşına çatmayanların hüquqlarının və təhlükəsizliyinin təmin olunması istiqamətində fəaliyyəti həyata keçirəcək. Dövlət Komitəsinin Məişət zorakılığının qarşısının alınması üzrə sektorunun əməkdaşı, Komitədə yaradılan MƏQ-in məsul katibi Rahil Süleymanzadə məişət zorakılığının qarşısının alınması sahəsində mövcud vəziyyət və görülmüş işlər barədə hesabatla çıxış edib. R.Süleymanzadə qeyd edib ki, məişət zorakılığının qarşısının alınması məqsədilə dövlət orqanları arasında əlaqələndirilmiş tədbirlərin həyata keçirilməsi və bu sahədə aidiyyəti orqanların fəaliyyətinin gücləndirilməsi əsas məsələlərdən biridir. 2014-cü ildən başlayaraq məişət zorakılığının qarşısının alınması istiqamətində ciddi addımlar atıldığını bildirən R.Süleymanzadə, son illərdə bu sahədə həyata keçirilən hüquqi islahatlar barədə məlumat verib. Daha sonra MƏQ-in gələcək fəaliyyəti ilə bağlı üvzlərin təklifləri dinlənilib. Dövlət Komitəsi tərəfindən yaradılan monitorinq və əlaqələndirmə qrupunun tərkibində təmsil olunan ekspert Abil Bayramov MƏQ-in fəaliyyətinin səmərəli təşkili məqsədilə aidiyyəti qurumlarla birlikdə məişət zorakılığına qarşı cavab tədbirlərinin monitorinqi üzrə indikatorların işlənib hazırlanmalı olduğunu bildirib. Qeyd olunub ki, bu halda monitorinqin nəticələri daha effektiv olacaq və informasiya bazası formalaşdırmaq mümkün olacaqdır. Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyəti sədrinin müşaviri Məftunə İsmayılova sosial-psixoloji xidmətlərin göstərilməsi məqsədilə böhran mərkəzlərinin və qaynar xəttin yaradılmasının vacibliyini qeyd edib. Monitorinq və əlaqələndirmə qrupunun yaradılmasının əhəmiyyətini qeyd edən “Təmiz Dünya” Qadınlara Yardım İctimai Birliyinin sədri Mehriban Zeynalova bildirib ki, qrupun işi qurumların bu prosesə hazırlığını, yanaşmasını və çevikliyini göstərəcək. M.Zeynalova bildirib ki, müvafiq sahəyə məsul əməkdaşlar mütəxəssis hazırlığına cəlb olunmalıdır. Sonda MƏQ-in fəaliyyəti və əhəmiyyəti ilə bağlı ictimaiyyətin məlumatlandırılması məqsədilə brifinq təşkil olunub.
Uşaq və Ailələrə Dəstək Mərkəzləri tərəfindən ailələlərə səfər edilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, Qəbələ, İsmayıllı, Zərdab, Zaqatala, Goranboy, Göygöl Uşaq və Ailələrə Dəstək Mərkəzləri tərəfindən 24-28 fevral 2025-ci il tarixlərində aidiyyəti qurumların nümayəndələrinin iştirakı ilə övladlığa götürülmüş, qəyyumluğa və ya himayəyə verilmiş uşaqların ailələrində monitorinqlər aparılıb, uşaqların yaşayış şəraiti, sağlamlıq və təhsil vəziyyəti ilə maraqlanılıb. Monitorinqlər zamanı ailələrə uşaqların şəxsi inkişafı və təhlükəsizliyi ilə bağlı zəruri tövsiyələr verilib. Qeyd edək ki, ümumilikdə 60-dan çox uşaqla monitorinq qiymətləndirmələr aparılıb və bu istiqamətdə ailə səfərləri davam etdirilir.
