Media

Xəbərlər

Tarixdən
Tarixədək
Arxiv
“Ailələrimizi tanıyaq” layihəsi davam edir

Layihənin növbəti qonağı Ağdam rayonundan olan Ağayevlər ailəsidir. Əlövsət Ağayev 8 mart 1962-ci ildə Ağdam rayonunun Üçoğlan kəndində müəllim ailəsində anadan olub. Xankəndi Pedaqoji İnstitutunun riyaziyyat müəllimliyi ixtisasını bitirib. Hazırda Səfərli kənd tam orta məktəbində riyaziyyat müəllimi işləyir. 41 ildir pedaqoji fəaliyyətlə məşğul olan Ə.Ağayev təhsil sahəsindəki xidmətlərinə görə müxtəlif mükafatlarla təltif edilib. Həyat yoldaşı Adilə Ağayeva 30 sentyabr 1967-ci ildə Ağdam rayonunun Böyükbəyli kəndində anadan olub. Azərbaycan Pedaqoji Xarici Dillər İnstitutunun alman-ingilis dili ixtisasını bitirib. Hazırda Səfərli kənd tam orta məktəbində İngilis dili müəllimi kimi çalışır. 35 ildən çox evli olan Ağayevlər ailəsinin 3 övladı (2 qız, 1 oğlan) və 3 nəvəsi var. Hər üç övladı ali təhsil alıb. Ə.Ağayev: “İlk növbədə gənclərə tövsiyəm odur ki, ailə anlayışını dərk edib ailə qursunlar. Sağlam ailə sağlam gələcəyin təminatçısıdır və ailənin uzunömürlü olması üçün səbirli olmaq, bir-birini dinləmək və anlayış göstərmək vacibdir. Ailə həyatında müxtəlif mərhələlər olur və hər mərhələdə insanın səbirli olması, qarşı tərəfi başa düşməsi çox önəmlidir. Həmçinin ailədə “mən haqlıyam” düşüncəsindən daha çox “biz necə razılaşa, ortaq məxrəcə gələ bilərik” yanaşması üstün olmalıdır. Bir-birini dinləmək, incitməməyə çalışmaq və ən əsası münasibəti qorumaq istəyi ailəni uzunömürlü edir”. A.Ağayeva: “Gənclərə tövsiyəmiz odur ki, ailə qurmağa tələsməsinlər. Bir-birlərini yaxşı tanısınlar, xasiyyətlərini, həyata baxışlarını, məqsədlərini anlasınlar. Ailə qurmaq yalnız sevgi deyil, həm də məsuliyyətdir. İnsan bu məsuliyyətə hazır olmalıdır. Qarşılıqlı hörmət, səbir və anlayış olmadan sağlam ailə qurmaq çətin olur. Ona görə də bu dəyərləri əvvəlcədən formalaşdırmaq vacibdir. Ailədə hər şey arzulanan kimi getməyə bilər, amma əsas odur ki, tərəflər bir-birinə dayaq olsun. Münasibətlər düzgün qurularsa, ailə bu çətinliklərin öhdəsindən rahatlıqla gələ bilər. Ailə qarşılıqlı sevgi, hörmət və diqqət üzərində qurulmalıdır. Bu dəyərlər qorunduğu müddətdə ailə də möhkəm və uzunömürlü olur. Maddi çətinliklər müvəqqətidir, amma mənəvi bağlar möhkəm olduqda ailə daha güclü olur. Xoşbəxt ailə təsadüfən yaranmır o, hər gün göstərilən diqqət, qayğı və sevgi ilə qurulur və qorunur”.

Ətraflı
Dövlət Komitəsi tərəfindən əlilliyi olan qadınlar üçün onlayn təlimlərə start verilib

Ailə, Qadın və Uşaq Problemləri üzrə Dövlət Komitəsi və “Maestro School”-un əməkdaşlığı ilə 23 sentyabr 2026-cı il tarixindən etibarən  “Fundamental İT bilikləri və ilkin rəqəmsal bacarıqlar” mövzusunda onlayn təlimlərə start verilib. Təlimlərin əsas məqsədi əlilliyi olan şəxslərin cəmiyyətə fəal inteqrasiyasının və məşğulluq imkanlarının artırılması, iştirakçıların fundamental İT və ilkin rəqəmsal bacarıqlarının inkişaf etdirilməsi, rəqəmsal alətlərdən gündəlik və peşəkar fəaliyyətlərində daha səmərəli istifadə imkanlarının artırılması, həmçinin onların özünəinam və motivasiyasının gücləndirilməsidir. Qeyd edək ki, təlimlər 23 sentyabr 2026-cı il tarixindən etibarən 3 ay müddətində, onlayn formatda keçiriləcək. Təlimlərdə 15 nəfər əlilliyi olan qadın iştirak edib. 

Ətraflı
“Ailə saatı”nda sağlamlıq imkanları məhdud uşaqlara internetin təhlükələrindən danışılıb

           Ailə, Qadın və Uşaq Problemləri üzrə Dövlət Komitəsinin təşkilatçılığı və Elm və Təhsil Nazirliyinin dəstəyi ilə “Ailə saatı” layihəsi çərçivəsində eşitmə və nitq qabiliyyəti məhdud uşaqların iştirakı ilə növbəti görüş keçirilib. Tədbirin məqsədi uşaqların asudə vaxtının maraqlı və faydalı təşkili, onların müxtəlif mövzularda maarifləndirilməsi ilə yanaşı, səmimi ünsiyyət və birgə fəaliyyət vasitəsilə uşaqlara xoş emosiyalar bəxş etmək, onlar üçün mehriban və dəstəkləyici mühit yaratmaq olub. ADA Universitetinin müəllimi, hüquq üzrə fəlsəfə doktoru Təbriz Cəfərov uşaqlara internetdən təhlükəsiz və məsuliyyətli istifadə, şəxsi məlumatların qorunması, rəqəmsal mühitdə yarana biləcək risklərin tanınması və belə hallarda düzgün davranış qaydaları barədə məlumat verib. Mövzu surdotərcümə edilərək, uşaqların yaş xüsusiyyətləri nəzərə alınmaqla, sadə və praktik nümunələr əsasında təqdim edilib, onların sualları cavablandırılıb. Görüşün davamında Azərbaycan Dövlət Kukla Teatrının yaradıcı heyətinin təqdim etdiyi bədii proqram sayəsində qurulan canlı ünsiyyət tədbirə xüsusi rəng qatıb. Uşaqların proqramda fəal iştirakı üçün şərait yaradılıb, birlikdə əyləncəli və yaddaqalan anlar yaşanıb.  

Ətraflı
Uşaq və Ailələrə Dəstək Mərkəzləri tərəfindən Anım Günü ilə əlaqədar tədbirlər keçirilib

Ailə, Qadın və Uşaq Problemləri üzrə Dövlət Komitəsinin tabeliyində olan Ağdam, Şüvəlan, Saatlı, Sabirabad, Hacıqabul, Zərdab, Qəbələ, İsmayıllı, Göygöl, Goranboy və Zaqatala Uşaq və Ailələrə Dəstək Mərkəzləri tərəfindən 27 sentyabr – Anım Günü ilə əlaqədar aidiyyəti qurumların əməkdaşları, Vətən müharibəsi iştirakçıları, şəhid ailələrinin üzvləri, məktəblilər və rayon ictimaiyyətinin nümayəndələrinin iştirakı ilə müxtəlif tədbirlər və ağacəkmə aksiyası keçirilib.   Tədbirlərdə Azərbaycan Respublikasının Dövlət Himni səsləndirilib və ərazi bütövlüyümüz uğrunda canından keçən Vətən övladlarının xatirəsi bir dəqiqəlik sükutla yad edilib.   Çıxış edənlər tarixi Zəfərimizdən danışıb, Müzəffər Ali Baş Komandan Prezident İlham Əliyevin rəhbərliyi ilə Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş şəhidlərimizə dərin ehtiramlarını bildirib, əziz xatirəsinin daim xalqımızın qəlbində yaşayacağını vurğulayıblar. Şagirdlərin təqdimatında vətənpərvərlik mövzusunda ədəbi - bədii kompozisiyalar nümayiş etdirilib.

Ətraflı
Dövlət Komitəsinin kollektivi 27 Sentyabr – Anım Günü ilə əlaqədar Zəfər parkını ziyarət edib

Ailə, Qadın və Uşaq Problemləri üzrə Dövlət Komitəsinin kollektivi 27 Sentyabr – Anım Günü ilə əlaqədar Bakıdakı Zəfər parkını ziyarət edib. Ziyarət zamanı Zəfər abidəsinin önünə gül dəstələri düzülüb, ölkəmizin ərazi bütövlüyü yolunda canlarını fəda edən şəhidlərimizin əziz xatirəsi ehtiramla yad edilib.

Ətraflı
İnsan alverinə qarşı mübarizə sahəsində əməkdaşlığın gücləndirilməsi məqsədilə onlayn görüş keçirilib

Ailə, Qadın və Uşaq Problemləri üzrə Dövlət Komitəsinin və Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi əməkdaşlarının iştirakı ilə insan alverinə qarşı mübarizə mövzusuna həsr edilən görüş keçirilib.  “Azərbaycan Respublikasında insan alverinə qarşı mübarizəyə dair 2026-2030-cu illər üçün Milli Fəaliyyət Planı”nın Tədbirlər Planına əsasən keçirilən görüşdə mövzu ilə bağlı vacib olan məsələlərə diqqət çəkilib.  Çıxışlarda insan alveri cinayətləri, məcburi əmək cinayətləri, aidiyəti qurumların bu sahədə mübarizə tədbirləri haqqında məlumat verilib. Müvafiq sahədə həyata keçirilən işlərin səmərəliliyinin artırılması, qurumlararası əməkdaşlığın daha da inkişaf etdirilməsi ilə bağlı təkliflər səsləndirilib.  Görüş çərşivəsində, həmçinin qarşıdakı dövr üçün nəzərdə tutulan fəaliyyətlər və birgə təşəbbüslər müzakirə olunub.

Ətraflı
Sədaqət Qəhrəmanova Türk Hüquqşünas Qadınlar Dərnəyinin sədri Zübeydə Aksayın rəhbərlik etdiyi nümayəndə heyəti ilə görüşüb

21 sentyabr 2026-cı il tarixində baş tutan görüşdə Vəkillər Kollegiyasının sədr müavini Pərviz Ələkbərov, Dövlət Komitəsinin müvafiq struktur bölmə rəhbər və əməkdaşları, eləcə də Vəkillər Kollegiyası Rəyasət Heyətinin üzvləri və Türk Hüquqşünas Qadınlar Dərnəyinin nümayəndələri iştirak ediblər. Görüşdə Dövlət Komitəsinin sədr müavini Sədaqət Qəhrəmanova qonaqları salamlayaraq, iki qardaş ölkə arasında bütün sahələrdə uğurla davam edən strateji tərəfdaşlıq əlaqələrinin hüquq müstəvisində də dərinləşməsindən mühüm məmnunluq duyduğunu bildirib. O, qadın hüquqlarının müdafiəsi, qadınların hüquqi maarifləndirilməsi və hüquqşünas qadınların peşəkar fəaliyyətinin dəstəklənməsi istiqamətində birgə təcrübə mübadiləsinin önəmini vurğulayıb.  Ölkəmizdə hüquqşünas qadınların sayının artdığını vurğulayan sədr müavini qadınların hüquq sahəsində fəallığının cəmiyyətin inkişafına mühüm töhfə verdiyini diqqətə çatdırıb. S.Qəhrəmanova qeyd edib ki, bu cür görüşlər iki ölkənin qadın hüquqşünasları arasında mövcud əlaqələrin daha da inkişaf etdirilməsi ilə yanaşı, əməkdaşlığın beynəlxalq platformalarda genişləndirilməsi və gələcək birgə layihələr üçün yeni imkanların formalaşdırılması baxımından böyük əhəmiyyət kəsb edir. Səmimi qəbula görə təşəkkürünü bildirən nümayəndə heyətinin rəhbəri Zübeydə Aksay Azərbaycanda olmaqdan qürur duyduqlarını ifadə edib. O, qadın hüquqşünasların beynəlxalq müstəvidə həmrəyliyinin gücləndirilməsinin vacibliyini qeyd edib. Zübeydə Aksay vurğulayıb ki, Azərbaycan və Türkiyə qadın hüquqşünasları arasında qurulan bu sıx əməkdaşlıq hər iki ölkədə qadın hüquqlarının müdafiəsi standartlarının daha da yüksəldilməsinə, birgə regional hüquqi təşəbbüslərin dəstəklənməsinə xidmət edəcəkdir. Görüş zamanı Azərbaycan və Türkiyə qadın hüquqşünasları arasında mövcud əlaqələrin daha da genişləndirilməsi, beynəlxalq müstəvidə əlaqələrin inkişaf etdirilməsi məqsədilə yeni imkanların dəyərləndirilməsi mövzusunda geniş fikir mübadiləsi aparılıb. Qeyd edək ki, Türk Hüquqşünas Qadınlar Dərnəyinin sədri Zübeydə Aksayın rəhbərlik etdiyi nümayəndə heyəti Vəkillər Kollegiyasının dəvəti ilə ölkəmizə səfər ediblər. 

Ətraflı
Uşaq və Ailələrə Dəstək Mərkəzləri tərəfindən “Denver II” qiymətləndirmə testi keçirilib

Ailə, Qadın və Uşaq Problemləri üzrə Dövlət Komitəsinin tabeliyində olan Şüvəlan, Ağdam, İsmayıllı, Qəbələ, Göygöl və Goranboy Uşaq və Ailələrə Dəstək Mərkəzləri tərəfindən 14-18 sentyabr 2026-cı il tarixlərində məktəbəqədər təhsil müəssisələrində “Denver II” qiymətləndirmə testi keçirilib. Testin keçirilməsində əsas məqsəd uşaqların yaşlarına uyğun inkişaf səviyyəsinin müəyyənləşdirilməsi, xüsusilə şəxsi-sosial, nitq, kiçik və böyük motor bacarıqlarının qiymətləndirilməsi olub. Qiymətləndirmə zamanı Mərkəzlərin əməkdaşları uşaqlar və onların valideynləri ilə fərdi şəkildə görüş keçirib, uşaqların diqqət, anlama, ünsiyyət və motor bacarıqları müşahidə olunub. Sonda uşaqların inkişaf göstəriciləri üzrə ümumi qiymətləndirmə aparılıb, valideynlərə və tərbiyəçi-müəllimlərə müvafiq tövsiyələr verilib.

Ətraflı
Bahar Muradova Kəlbəcərdə məktəb kollektivi və şagirdlərlə görüşüb

Ailə, Qadın və Uşaq Problemləri üzrə Dövlət Komitəsinin sədri Bahar Muradova Kəlbəcər rayonuna səfəri çərçivəsində Bəhmən Cəfərov adına 1 saylı tam orta məktəbdə olub, məktəb kollektivi və şagirdlərlə görüşüb. Görüş zamanı məktəbin fəaliyyəti, tədris prosesi və şagirdlərin təhsil imkanları ilə maraqlanan Komitə sədri uşaqların fikir və təkliflərini dinləyib, onların təhsilə, gələcək planlarına və qarşılaşdıqları məsələlərə dair düşüncələri ilə tanış olub. Məktəbdə təhsil alan, Komitə yanında fəaliyyət göstərən “Uşaq Səfirlər Məclisi”nin iki üzvü ilə də görüşən Bahar Muradova onların təhsildəki nailiyyətləri, ictimai fəallığı və Məclisin fəaliyyəti çərçivəsində gördükləri işlərlə maraqlanıb. Uşaqların təşəbbüslərinin dəstəklənməsinə onların ictimai həyatda fəal iştirakının və potensialının inkişaf etdirilməsi üçün imkanların yaradılmasına, hüquqlarının qorunmasına, sağlam və təhlükəsiz mühitdə böyüməsinə yönələn dövlət siyasətinin əsas istiqamətləri barədə məlumat verib. Həmçinin yenidən qurulan Kəlbəcərdə, doğma yurda qayıdan ailələrin, xüsusilə uşaqların təhsili və inkişafı üçün hər cür şəraitin yaradılmasından razılığını bildirən soydaşlarımızın istəkləri ilə maraqlanıb

Ətraflı