Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
BMT-də rəqəmsal texnologiyaların qadın hüquqlarına təsirinə həsr olunmuş yan tədbir keçirilib
12 mart 2026-cı il tarixində BMT-nin Qadınların Statusu üzrə Komissiyanın 70-ci sessiyası çərçivəsində Qambiya Respublikası və Türkiyə Respublikasının BMT yanında Daimi Nümayəndəliklərinin təşkilatçılığı ilə "Rəqəmsal texnologiyaların qadın hüquqlarına təsiri" mövzusunda yan tədbir keçirilib. Müzakirələr zamanı gender bərabərliyinin təşviqi, qadınların cəmiyyətin bütün sahələrində iştirakının genişləndirilməsi və rəqəmsal texnologiyaların bu prosesə təsiri ilə bağlı məsələlər ətrafında fikir mübadiləsi aparılıb. Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova qadın hüquqlarının qorunması və gender bərabərliyinin təşviqinin beynəlxalq gündəliyin əsas prioritetlərindən biri olduğunu vurğulayıb. O, qadınların və qızların imkanlarını məhdudlaşdıran sosial və mədəni maneələrin aradan qaldırılmasının əhəmiyyətindən danışıb, erkən və yaxın qohumlar arasında evliliyin qızların təhsilə çıxışına maneə törətdiyini, onların sosial və iqtisadi potensialına mənfi təsir göstərdiyini bildirib. Komitə sədri Azərbaycanda qadınlara qarşı zorakılığın qarşısının alınması, gender bərabərliyinin təşviqi və qadınların ictimai-siyasi həyatda iştirakının genişləndirilməsi istiqamətində ardıcıl tədbirlərin həyata keçirildiyini diqqətə çatdırıb. Bu sahədə yeni milli tədbirlər planının hazırlandığını və növbəti üç ili əhatə edən Gender Bərabərliyi üzrə Milli Fəaliyyət Planının qəbul edildiyini bildirib. Əlavə edib ki, erkən və yaxın qohumlar arasında evliliyin qarşısının alınması məqsədilə qanunvericilik təkmilləşdirilir, qızların təhsil imkanlarının genişləndirilməsinə yönəlmiş layihələr həyata keçirilir. B. Muradova, Prezident İlham Əliyevin qərarı ilə yaradılmış Azərbaycan Respublikasının Rəqəmsal İnkişaf Şurasının fəaliyyətinə toxunaraq qeyd edib ki, ölkənin Birinci vitse-prezidenti Mehriban Əliyevanın rəhbərlik etdiyi bu qurum innovasiya, rəqəmsal texnologiyalar və süni intellekt sahəsində strateji yanaşmanın formalaşdırılmasına, eləcə də rəqəmsal imkanlardan hamının, o cümlədən qadınların daha geniş faydalanmasının təmin olunmasına xidmət edir. Dövlət Komitəsinin sədri çıxışında rəqəmsal transformasiyanın qadınların imkanlarının genişlənməsində mühüm rolundan da danışıb. Bununla yanaşı, onlayn zorakılıq, kiber təqib və şəxsi məlumatların sui-istifadəsi kimi yeni çağırışların mövcudluğuna diqqət çəkərək, rəqəmsal mühitdə təhlükəsizliyin təmin olunmasının və rəqəmsal savadlılığın artırılmasının vacibliyini vurğulayıb.
“Həyatının memarı-Sən özünsən” adlı layihə çərçivəsində maarifləndirici görüş keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı, Səhiyyə Nazirliyi, Elm və Təhsil Nazirliyinin dəstəyi ilə Bakı şəhəri Nəsimi rayonunda yerləşən Akif Abdullayev adına 211 nömrəli tam orta məktəbdə “Həyatının memarı- Sən özünsən” adlı layihə çərçivəsində maarifləndirici görüş keçirilib. Valideynlər arasında maarifləndirmə işinin gücləndirməsi məqsədilə keçirilən tədbirdə məktəbin psixoloqu, müəllim heyəti və valideynlər iştirak edib. Görüşdə Dövlət Komitəsinin əməkdaşı Nailə İbrahimova və Səhiyyə Nazirliyinin İctimai Səhiyyə və İslahatlar Mərkəzinin həkim-mütəxəssisi Ülkər Camalova çıxış edərək, narkomaniyanın insan sağlamlığına zərəri, cəmiyyət üçün yaratdığı problemlər və onunla mübarizə istiqamətində həyata keçirilən tədbirlər bardə məlumat veriblər. Çıxışçılar valideyn məsuliyətinin, sağlam ailə mühitinin, düzgün tərbiyə və davamlı nəzarətin yeniyetmələrin zərərli vərdişlərdən uzaq böyüməsindəmühüm rol oynadığını qeyd ediblər. Müzakirə formatında davam edən görüşdə iştirakçıları maraqlandıran suallar cavablandırılıb. Tədbirin sonunda mövzu ilə bağlı maarifləndirici kitabçalar paylanılıb.
“Reproduktiv sağlamlıq və ailə planlaşdırılması” mövzusunda növbəti görüşlər keçirilib
10-12.03.2026-cı il tarixlərində Ailə, Qadın və Uşaq Problemləri üzrə Dövlət Komitəsi tərəfindən Elm və Təhsil Nazirliyinin dəstəyi və Səhiyyə Nazirliyinin ekspertinin iştirakı iləBakı Qızlar Universiteti və Azərbaycan Dövlət İqtisad Universitetinin nəzdində Azərbaycan Maliyyə-İqtisad Kollecində “Reproduktiv sağlamlıq və ailə planlaşdırılması” mövzusunda növbəti görüşlər keçirilib. Gənclərin ailə həyatına hazırlanması məqsədi ilə keçirilən tədbirlərdəDövlət Komitəsinin əməkdaşları Kamila Əliyeva və Rafiq Mahmudov, Səhiyyə Nazirliyinin İctimai Səhiyyə İslahatlar Mərkəzinin həkim-metodistləri Zümrüd Kazımova və Teymur Ağazadə tələbələrə mövzu ilə bağlı maarifləndirici məlumatlar veriblər. Çıxışçılar Azərbaycanda demoqrafik təhlükəsizliyin təmin olunması və sağlam nəslin yetişdirilməsinin diqqət mərkəzində saxlanıldığını vurğulayaraq, ailələrin sağlamlığının qorunması istiqamətində görülən işlərdən bəhs ediblər. Daha sonra ekspertlər təhlükəsiz reproduktiv davranışlar, ailədə sağlam uşaqların doğulmasının vacibliyi barədə danışıb, ailə planlaşdırılmasına dair tövsiyələr səsləndiriblər. Görüşün sonunda iştirakçıların sualları cavablandırılıb. Tədbirlərdə ümumilikdə 311 tələbə iştirak edib.
Bahar Muradova Serbiyanın ailə rifahı və demoqrafiya naziri ilə əməkdaşlıq imkanlarını müzakirə edib
BMT-nin Baş Qərargahında keçirilən Qadınların Statusu üzrə Komissiyanın 70-ci sessiyası çərçivəsində ABŞ-də səfərdə olan Ailə, Qadın və Uşaq Problemləri üzrə Dövlət Komitəsinin sədri Bahar Muradova Serbiya Respublikasının ailə rifahı və demoqrafiya naziri Yelena Zariç Kovaçeviç ilə görüşüb. Görüşdə iki ölkə arasında ailə siyasəti, qadınların hüquqlarının müdafiəsi və demoqrafik inkişaf sahəsində əməkdaşlıq imkanları müzakirə olunub. Tərəflər xüsusilə bu sahələrdə birgə layihələrin həyata keçirilməsinin və əməkdaşlığın institusional əsaslarının gücləndirilməsinin vacibliyini qeyd ediblər. Dövlət Komitəsinin sədri Bahar Muradova Azərbaycan və Serbiya arasında mövcud dostluq münasibətlərinin ailə, qadın və demoqrafiya siyasəti sahələrində əməkdaşlığın inkişafı üçün zəmin yaratdığını qeyd edib. Birgə fəaliyyətin daha səmərəli təşkili üçün çevik əlaqə və işçi qruplarının yaradılmasının vacibliyini vurğulayan B. Muradova bildirib ki, bu cür addımlar əməkdaşlığın konkret fəaliyyət müstəvisinə keçməsinə şərait yaradacaq. Serbiyanın ailə rifahı və demoqrafiya naziri Yelena Zariç Kovaçeviç Serbiyada demoqrafiya strategiyasının hazırlanması, ailələrin müdafiəsi və gənc ailələrə dövlət dəstəyinin gücləndirilməsi istiqamətində aparılan işlər barədə məlumat verib. O, bu sahədə Azərbaycanın əldə etdiyi müsbət təcrübənin öyrənilməsinin faydalı olacağını bildirərək, gələcəkdə birgə layihələrin həyata keçirilməsinin əhəmiyyətini qeyd edib. Görüş tərəflərin gələcək əməkdaşlıq perspektivlərinin müzakirəsi, birgə faydalı təşəbbüslərin həyata keçirilməsi və qarşılıqlı səfərlərin təşkili istiqamətində müzakirələrlə davam edib.
“Gender bərabərliyi və qadınların səlahiyyətlərinin artırılması” mövzusundə yüksək səviyyəli dəyirmi masa keçirilib
BMT-nin Qadınların Statusu üzrə Komissiyasının 70-ci Sessiyasında “Gender bərabərliyi və qadınların səlahiyyətlərinin artırılması” mövzusundə yüksək səviyyəli dəyirmi masa keçirilib. Sessiya çərçivəsində keçirilən tədbirdə Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva çıxış edərək, sosial siyasət, qadınların gücləndirilməsi və cəmiyyətdə ailə dəyərlərinin təşviqi istiqamətində Azərbaycanın təcrübələri barədə ətraflı məlumat verib. C.Rəhmətullayeva qeyd edib ki, sosial siyasətin əsas istiqamətlərindən biri qadınların gücləndirilməsi, gənc nəslə ailə dəyərlərinin aşılanması və yaşlı nəslə hörmətin təşviq olunmasıdır. Onun sözlərinə görə, bu prinsiplər sağlam və dayanıqlı cəmiyyətin formalaşmasının əsas prioritetlərindən biridir. Sonda vurğulanıb ki, qadınların cəmiyyətdə rolunun gücləndirilməsi, ailə institutunun dəstəklənməsi və nəsillərarası həmrəyliyin təşviqi sosial inkişafın və cəmiyyətin rifahının təmin edilməsində mühüm əhəmiyyət kəsb edir.
Nyu-Yorkda qadınların səlahiyyətləndirilməsi mövzusunda yan tədbir keçirilib
BMT-nin Qadınların Statusu üzrə Komissiyasının 70-ci sessiyası çərçivəsində Serbiyanın təşəbbüsü, Ailə, Qadın və Uşaq Problemləri üzrə Dövlət Komitəsinin həmtəşkilatçılığı ilə “Qadınların əhəmiyyətli rolu: Gücləndirilmə üçün ittifaqlar” mövzusunda yan tədbir keçirilib. Tədbirdə qadınların səlahiyyətləndirilməsi və beynəlxalq əməkdaşlığın gücləndirilməsi məsələləri müzakirə edilib. Çıxış edən Dövlət Komitəsinin sədri Bahar Muradova, Azərbaycanda qadın hüquqlarının qorunması və ictimai-siyasi həyatda iştirakının genişləndirilməsi istiqamətində görülən işlərdən danışıb, həyata keçirilən dövlət proqramlarının qadınların liderlik bacarıqlarının inkişafına, iqtisadi imkanlarının genişləndirilməsinə və qərarvermə proseslərində iştirakının artırılmasına töhfə verdiyini deyib, müsbət statistik göstəriciləri diqqətə çatdırıb. Dövlət Komitəsinin sədri çıxışının sonunda qadınların səlahiyyətləndirilməsinin ailənin güclənməsi, cəmiyyətin sabitliyi, eləcə də dövlətlərin dayanıqlı inkişafı üçün vacib olduğunu bildirərək, bir sıra təklifləri səsləndirib.
Dövlət Komitəsinin “Ailələrimizi tanıyaq” layihəsinin növbəti qonağı şəhid Elvin Abdurahmanovun ailəsidir
Ailə, Qadın və Uşaq Problemləri üzrə Dövlət Komitəsinin “Ailələrimizi tanıyaq” layihəsinin növbəti qonağı Qəbələ rayonunun sayılıb-seçilən, nümunəvi ailələrindən olan, şəhid Elvin Abdurahmanovun ailəsidir. Ailənin başçısı Əbülfəz Abdurahmanov 1964-cü ildə Qəbələ rayonunun Vəndam qəsəbəsində anadan olub. Həmin qəsəbənin orta məktəbində təhsil alıb, Ağdaş Kənd Təsərrüfatı Texnikumunun aqronomluq ixtisasını bitirib. Əvvəllər Əmirvan kənd bələdiyyəsinin sədri olub, hazırda fərdi təsərrüfatla məşğuldur. Həyat yoldaşı Elmira Abdurahmanova 1973-cü ildə Əmirvan kəndində anadan olub. Həmin kəndin tam orta məktəbində təhsil alıb, Əmirvan kənd Mədəniyyət klubunda mədəni təşkilatçı kimi çalışır. 34 ildir birgə ömür sürən bu ailənin 3 övladı (oğlu), 1 nəvəsi var. Ailənin böyük oğlu Məcnun Abdurahmanov Əmirvan kəndində anadan olub. Bakı Mühəndislik Universitetinin kompüter mühəndisliyi ixtisasının bakalavr pilləsini, Estoniyanın Tartu Universitetinin eyni ixtisas üzrə magistratura pilləsini bitirib. Kiçik oğlu Elçin Abdurahmanov Azərbaycan Dövlət İqtisad Universitetinin kompüter mühəndisliyi ixtisasını bitirib. Ailəlidir bir övladı var. Ortancıl oğlu, şəhid Elvin Abdurahmanov 1 oktyabr 1996-cı ildə Əmirvan kəndində anadan olub. Əmirvan kənd tam orta məktəbində təhsil alıb. O, uşaqlıqdan idmana xüsusi maraq göstərib. 2014-2016-cı illərdə Azərbaycan Silahlı Qüvvələrində müddətli həqiqi hərbi xidmətdə olub. 2017-ci ildən isə müddətdən artıq həqiqi hərbi xidmət qulluqçusu olub. Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə savaşıb, 2020-ci ilin oktyabrın 2-də Füzuli döyüşləri zamanı qəhrəmancasına şəhid olub. Ölümündən sonra “Vətən uğrunda”, “Azərbaycan bayrağı”, “Cəsur döyüşçü”, “Cəbrayılın azad olunması” və “Füzulinin azad olunması” medalları ilə təltif edilib. Əbülfəz Abdurahmanov: “Elvin kiçik yaşlarından vətən sevgisi ilə böyüb, hər zaman torpağa, bayrağa və dövlətə sədaqət göstərib. O nümunəvi övlad olmaqla yanaşı, həm də vətənpərvər gənc idi. Əziz gənclər! Bilin ki, vətəni sevən ailələrdən doğulan övladlar heç vaxt əyilməz. Uşağa vətəni sevməyi demək kifayət deyil, bunu yaşatmaq lazımdır. Bayrağa hörmət, torpağa bağlılıq, dövlətə sədaqət gündəlik davranışdan başlayır”. Elmira Abdurahmanova: “Ailədə milli-mənəvi dəyərlərin qorunması vacibdir. Biz evdə həm böyüyə hörməti, həm də kiçiyə qayğını əsas prinsip seçmişik. Bu dəyərlər uşaqların xarakterini formalaşdırır. Ailədə birlik və qarşılıqlı dəstək həyatın çətin anlarında ən böyük dayaqdır. Əgər bir-birinizi dəstəkləyirsinizsə, həyatın bütün sınaqları asanlaşır. Hər iki tərəf bir-birini başa düşməli və ailəni qorumağı əsas məqsəd bilməlidir. Ailənizi qoruyun, dəyərlərinizi yaşadın”. Hörmətli Abdurahmanovlar ailəsinə dəyərli fikirlərini bizimlə bölüşdüyünə görə təşəkkürümüzü bildirir, onlara uzun ömür və möhkəm cansağlığı arzu edirik.
“Məişət zorakılığından zərər çəkmiş uşaqların müəyyən edilməsi və onlara psixoloji yardımın göstərilməsi” mövzusunda seminar keçirilib
10 mart 2026-cı il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə Tahir Bağırov adına 59 saylı tam orta məktəbdə Bakı şəhəri Xətai rayonu ərazisində yerləşən məktəblərin psixoloqları üçün məişət zorakılığından zərər çəkmiş uşaqların müəyyən edilməsi, onlara psixoloji yardımın göstərilməsi və belə halların qarşısının alınmasına dair seminar keçirilib. Tədbirdə Bakı şəhəri Xətai rayon İcra Hakimiyyətinin nümayəndəsi, yerli icra hakimiyyəti yanında yaradılmış məişət zorakılığının qarşısının alınması sahəsində monitorinq və əlaqələndirmə qrupunun sədri Pənah İmanov və Dövlət Komitəsinin Hüquqi təminat şöbəsinin Məişət zorakılığının qarşısının alınması sektorunun müdiri Vəfa Ələkbərova açılış nitqi ilə çıxış edərək mövzunun aktuallığından danışıblar. Daha sonra çıxış edən Elm və Təhsil Nazirliyinin əməkdaşı Günel Səfərova məktəb psixoloqlarına məişət zorakılığı hallarının vaxtında aşkar edilməsi və operativ müdaxilə ilə bağlı məktəb psixoloqlarına tövsiyələr verib. Seminarda Dövlət Komitəsinin əməkdaşı İradə Məmmədova “Məişət zorakılığının qarşısının alınması haqqında Azərbaycan Respublikasının Qanunu və məişət zorakılığına məruz qalmış şəxslərin müdafiəsi” barədə, Psixologiya Elmi-Tədqiqat İnstitutunun, Elm və Təhsil Nazirliyinin, Bakı Şəhəri üzrə Təhsil İdarəsinin psixoloqları Nigar Əsgərova, Nərmin Abbasova və Aysel Novruzova isə ”Məişət zorakılığına məruz qalmış uşaq və yeniyetmələrin psixodiaqnostikası”, “Uşaqlara qarşı zorakılığın diaqnostikası və fəsadları”, “Məktəbdə görünməyən travmalar: məktəb psixoloqunun rolu və müdaxilə imkanları” ilə bağlı təqdimatlarla çıxış ediblər. Sonda məktəbin direktoru Fəzail Məmmədov iştirakçılara təşəkkür edib və belə tədbirlərin davamlı keçirilməsinin vacibliyini vurğulayıb.
Bahar Muradova BMT-nin iclasında qadınların zorakılıqdan müdafiəsi ilə bağlı Azərbaycan təcrübəsindən danışıb
Ailə, Qadın və Uşaq Problemləri üzrə Dövlət Komitəsinin sədri Bahar Muradova Türkiyənin təşəbbüsü və Azərbaycanın həmtəşkilatçılığı ilə BMT-nin Qadınların Statusu üzrə Komissiyasının 70-ci sessiyası çərçivəsində təşkilatın İqtisadi və Sosial Şurasında (ECOSOC) keçirilən yan tədbirdə çıxış edib. B.Muradova qadınların ədalətə çıxış imkanlarının texnoloji vasitələrlə genişləndirilməsinin beynəlxalq səviyyədə müzakirəsinin böyük əhəmiyyət daşıdığını qeyd edib. Komitə sədri bildirib ki, hüququn mövcudluğu ilə yanaşı, ona real çıxışın təmin olunması vacibdir. O, ədalətə çıxışın yalnız hüquqi mexanizm deyil, eyni zamanda inkişafın, təhlükəsizliyin və insan hüquqlarının əsas şərtlərindən biri olduğunu deyib. B. Muradova, BMT-nin Dayanıqlı İnkişaf Məqsədlərinin gender bərabərliyini nəzərdə tutan 5-ci məqsədilə sülh, ədalət və güclü institutları hədəfləyən 16-cı məqsədinin bir-birini tamamladığını diqqətə çatdırıb. O qeyd edib ki, rəqəmsal transformasiya ədalət sistemlərinə yeni imkanlar açır. Elektron müraciət sistemləri, onlayn hüquqi məlumat bazaları və rəqəmsal monitorinq mexanizmləri qadınların müdafiə imkanlarını genişləndirərək hüquqi prosedurların daha operativ həyata keçirilməsinə şərait yaradır. Dövlət Komitəsinin sədri, Azərbaycanda qadınların zorakılıqdan müdafiəsi və ədalətə çıxışının gücləndirilməsi istiqamətində hüquqi və institusional mexanizmlərin təkmilləşdirildiyini, qanunvericiliyin beynəlxalq öhdəliklərə uyğunlaşdırıldığını, mühafizə orderləri və sosial dəstək mexanizmlərinin genişləndirildiyini qeyd edib. Bahar Muradova bildirib ki, rəqəmsal ədalət əlçatanlıq, təhlükəsizlik, məxfilik və insan mərkəzli yanaşma prinsiplərinə əsaslanmalı, süni intellekt və avtomatlaşdırılmış sistemlərin tətbiqində gender həssaslığı və qərəzsizlik təmin edilməlidir. Əlavə edib ki, əks halda alqoritmik qərəz mövcud bərabərsizlikləri dərinləşdirə bilər. Çıxışının sonunda o vurğulayıb ki, ədalətin gələcəyi texniki baxımdan rəqəmsal olsa da, mahiyyət etibarilə etik prinsiplərə və insan hüquqlarına əsaslanmalı, tətbiq olunan texnologiyalar isə inklüziv olmalı və yeni rəqəmsal uçurumlar yaratmamalıdır.