Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Uşaqların hüquqi biliklərinin artırılması məqsədi ilə görüş keçirilib
17 mart 2026-cı il tarixində Bakı şəhəri Nizami rayonu 238 saylı orta məktəbdə uşaqların hüquqi biliklərinin artırılması məqsədi ilə “Uşaqlar və Hüquq” mövzusunda görüş keçirilib. Görüşdə açılış nitqi ilə çıxış edən məktəbin direktoru təlimin mövzusu və əhəmiyyəti ilə bağlı iştirakçıları məlumatlandırıb. Uşaq Səfirlər Məclisinin üzvləri Tərlan Əhədzadə və Fatimə Fətəliyeva çıxış edərəkMəclisin fəaliyyəti barədə ətraflı məlumat verib. Daha sonra Ailə, Qadın və Uşaq Problemləri üzrə Dövlət Komitəsinin əməkdaşı Tural Hüseynzadə təlim iştirakçılarına uşaq hüquqları, mili qanunvericiliyin müddəaları və digər mövzular barədə danışıb. İnteraktiv müzakirələr şəklində keçən görüşdə məktəbin rəhbərliyi, müəllim və şagird heyəti və məktəb psixoloqu iştrak edib. Tədbirdə Dövlət Komitəsi tərəfindən hazırlanmış “Uşaqlar və Hüquq” adlı maarifləndirici vəsait barədə də məlumat təqdim edilib, iştirakçıları maraqlandıran suallar cavablandırılıb.
“Dəyərdən-davranışa” adlı layihə çərçivəsində ilk tədbir keçirilib
Ailə, Qadın və Uşaq Problemləri üzrə Dövlət Komitəsi və Azərbaycan Bələdiyyələrinin Milli Assosiasiyaları arasında birgə əməkdaşlıq haqqında anlaşma memorandumu çərçivəsində 17 mart 2026-cı il tarixində Pirallahı Bələdiyyəsi ilə birgə “Dəyərdən-davranışa” adlı layihə çərçivəsində tədbir keçirilib. Layihənin əsas məqsədi bələdiyyələrin resurs və potensialından səmərəli istifadə etməklə əhalinin maarifləndirilməsinə çıxış imkanlarının artırılması, birgə əməkdaşlıq sayəsində cəmiyyət arasında milli-mənəvi dəyərlərin qorunub saxlanılması, ailə dəyərləri, ailədaxili ünsiyyət və valideyn məsuliyyəti istiqamətində çoxşaxəli fəaliyyət aparılmasıdır. Tədbiri giriş sözü ilə açan Pirallahı rayon İcra Hakimiyyəti başçısının müavini–Ərazi-təşkilat və ictimai-siyasi məsələlər şöbəsinin müdiri Zülfiyyə Məmmədhüseynova çıxış edərək bildirib ki, belə layihələrin keçirilməsi əhali arasında milli-mənəvi dəyərlərin təbliğini daha da gücləndirməyə, cəmiyyətdə ailənin rolu və valideyn məsuliyyəti, gənc nəslin tərbiyəsinə xüsusi önəm verilməsinə əhəmiyyəti daha da artırır. Daha sonra Ailə, Qadın və Uşaq Problemləri üzrə Dövlət Komitəsinin Ailə məsələləri şöbəsinin əməkdaşı Nərgiz Sədrəddinbəyli və Şüvəlan Uşaq və Ailələrə dəstək mərkəzinin psixoloqu Aytəkin Məmmədova layihənin mahiyyəti və məqsədi haqqında ətraflı məlumat verərək bildiriblər ki, müstəqil Azərbaycan Respublikasında sosial sahədə dövlət siyasətinin prioritet istiqamətlərindən birini məhz ailə siyasəti təşkil edir. Qeyd edilib ki, qloballaşma, informasiya texnologiyalarının sürətli inkişafı, internetin həyatın hər sahəsinə nüfuz etməsi bir sıra müsbət tendensiyalarla yanaşı, bəzən neqativ rol da oynayır. Fiziki və mənəvi baxımdan sağlam ailə sağlam cəmiyyətin, güclü dövlətin özülüdür. Azərbaycan Respublikasının dövlət ailə siyasətinin həyata keçirilməsi istiqamətində milli-mənəvi dəyərlərə söykənən ailə institutunun qorunub saxlanılması və möhkəmləndirilməsi üçün kompleks tədbirlərin görülməsi mühüm əhəmiyyət kəsb edir. Sonra çıxış edən Pirallahı Rayon Polis İdarəsinin əməkdaşı Nurlan Hüseynov və Pirallahı Bələdiyyəsinin sədri Əli Kərimov layihənin əhəmiyyətindən bəhs ediblər. Rayon ərazisində fəaliyyət göstərən idarə, müəssisə və təşkilatların nümayəndələri və rayon sakinlərinin iştiraki ilə keçən tədbir layihəyə aid videoçarxların nümayişi və diskussiyalarla davam edib. Yekunda məlumatlandırıcı vəsaitlər təqdim edilib.
İndoneziya ilə qadın və uşaq məsələləri sahəsində əməkdaşlıq imkanları müzakirə edilib
18 mart 2026-cı il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova İndoneziya Respublikasının ölkəmizdəki fövqəladə və səlahiyyətli səfiri Berlian Helmi ilə görüşüb. Qonaqları salamlayan Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycanla İndoneziya arasındakı münasibətlərin həm ikitərəfli, həm də çoxtərəfli formatda yüksələn xətlə inkişaf etdiyini vurğulayıb. O əlavə edib ki, oxşar adət və etiqada sahib olmağımız gündəlik həyatda olduğu kimi, dövlətlərarası münasibətlərdə də özünü göstərir. Hazırda dünya ölkələrinin sürətli transformasiya mərhələsindən keçdiyini vurğulayan sədr, belə görüşlərin fəaliyyətlərin müxtəlif aspektləri ilə bağlı fikir mübadiləsi aparmaq baxımından vacib olduğunu deyib. Ailə, qadın və uşaq məsələlərinin bütün ölkələr və xalqlar üçün prioritet olduğunu vurğulayan sədr, müvafiq sahələrin insan kapitalının inkişafında mühüm rol oynadığını bildirib. B.Muradova qeyd edib ki, Azərbaycan bu istiqamətləri daim diqqətdə saxlayır, həm müasir dəyişikliklərə uyğunlaşmağa, həm də milli dəyərlərin, köklərin və ənənələrin qorunub saxlanmasına xüsusi önəm verir. Azərbaycanın müharibədə əldə etdiyi qələbədən sonra ölkədə bütün sahələrə yanaşmada yeni baxış formalaşdığını bildirən Komitə sədri əlavə edib ki, hazırda fəaliyyətimizi zəfərin yaratdığı imkanlardan istifadə etməklə daha sürətli inkişafın təmin olunmasına yönəldirik. O, həmçinin diqqətə çatdırıb ki, Dövlət Komitəsi fəaliyyətinin müxtəlif istiqamətləri üzrə beynəlxalq təşkilatlarla və ikitərəfli formatda əməkdaşlığı davam etdirir. Bu çərçivədə İndoneziya ilə əlaqələrin xüsusi əhəmiyyət daşıdığını qeyd edən B.Muradova, gələcək perspektivlər və birgə fəaliyyət imkanları ətrafında fikir mübadiləsinin aparılmasının vacibliyini vurğulayıb. Səmimi qəbula görə təşəkkür edən İndoneziya Respublikasının ölkəmizdəki fövqəladə və səlahiyyətli səfiri Berlian Helmi Azərbaycan və İndoneziya arasında mədəni və sosial sahələrdə ortaq dəyərlərin mövcud olduğunu qeyd edərək, qarşılıqlı tərəfdaşlığın inkişafında maraqlı olduğunu bildirib. Xüsusilə qadın hüquqlarının qorunması və uşaqların müdafiəsi istiqamətində əməkdaşlıq potensialını vurğulayan səfir bildirib ki, bu sahə İndoneziyanın inkişaf prioritetləri sırasında mühüm yer tutur və hər iki ölkənin mövqeləri beynəlxalq platformalarda, xüsusilə İslam Əməkdaşlıq Təşkilatı, Birləşmiş Millətlər Təşkilatı və Qoşulmama Hərəkatı çərçivəsində üst-üstə düşür. B. Helmi xalqlar arasında intensiv kommunikasiyanın inkişaf etdirilməsinin vacibliyini qeyd edərək, qadın və uşaq hüquqları sahəsində əməkdaşlığın institusional əsaslarının gücləndirilməsinin əhəmiyyətini vurğulayıb. Görüş tərəflərin gələcək əməkdaşlıq perspektivləri və birgə faydalı təşəbbüslərin həyata keçirilməsi istiqamətində müzakirələrlə davam edib.
“Ailə, qadın və uşaq məsələləri televiziya məkanında – işıqlandırma prinsipləri: qanunvericilik və etik məqamlar” mövzusunda təlim keçirilib
16-17 mart 2026-cı il tarixlərində Ailə, Qadın və Uşaq Problemləri üzrə Dövlət Komitəsində “Ailəm” könüllüləri və Komitədə təcrübə keçən universitet tələbələrinin iştirakı ilə “Ailə, qadın və uşaq məsələləri televiziya məkanında - işıqlandırma prinsipləri: qanunvericilik və etik məqamlar” mövzusunda təlimkeçirilib. Dövlət Komitəsinin Analitik təhlil və informasiya təminatı şöbəsinin əməkdaşı Aysel Babayevanın apardığı təlim zamanı ailə, qadın və uşaq məsələlərinin media məkanında işıqlandırılmasının hüquqi və etik əsasları barədə məlumat verilib. Bildirilib ki, bu mövzular mediada işıqlandırılarkən insan hüquq və azadlıqlarına, şəxsi həyatın toxunulmazlığına, uşaqların ali mənafeyinə və gender həssaslığı prinsipinə xüsusi diqqət yetirilməlidir. Həmçinin beynəlxalq prinsiplər, milli qanunvericiliyin tələbləri, eləcə də jurnalist etikası çərçivəsində ailə münasibətləri, qadın hüquqları, uşaqların müdafiəsi və zərərli informasiyadan qorunması məsələləri ətrafında geniş fikir mübadiləsi aparılıb. Həmçinin reytinq naminə həssas həyat hekayələrinin sensasion formada təqdim olunmasının yaratdığı mənfi nəticələrdən bəhs edilib, media nümayəndələrinin bu sahədə peşəkar və məsuliyyətli yanaşmasının vacibliyi vurğulanıb. Təlim çərçivəsində iştirakçılarla interaktiv müzakirələr aparılıb, praktik situasiyalar əsasında etik yanaşmalar təhlil olunub, mövzu üzrə suallar cavablandırılıb.
“Uşaqların rəqəmsal mühitdə təhlükəsizliyi” mövzusunda maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı və Elm və Təhsil Nazirliyinin dəstəyi ilə Bakı şəhərində İlyas Əfəndiyev adına Elitar Gimnaziyada və 220 saylı məktəb-liseydə “Uşaqların rəqəmsal mühitdə təhlükəsizliyi” mövzusunda maarifləndirici görüşlər keçirilib. Görüşlərdə Dövlət Komitəsinin əməkdaşları Rafiq Mahmudov və Ləman Mahmudova çıxış edərək “fişinq” hücumları, kibertəhlükələr, sosial şəbəkələrdən düzgün istifadə qaydaları və rəqəmsal mühitdə təhlükəsizlik qaydaları barədə ətraflı məlumat veriblər. Tədbirər çərçivəsində interaktiv müzakirələr aparılıb, şagirdlərin sualları cavablandırılıb. Həmçinin “Təhlükəsiz internet” mövzusunda sosial çarx nümayiş etdirilib. Görüşlərin əsas məqsədi şagirdlərdə rəqəmsal savadlılığın yüksəldilməsi, onlayn risklər barədə məlumatlılığın artırılması və təhlükəsiz internet vərdişlərinin formalaşdırılması olub. Ümumilikdə tədbirlərdə 220-yə yaxın şagird iştirak edib.
“Ailələrimizi tanıyaq” layihəsi uğurla davam edir
Sağlam və güclü təməllər üzərində qurulan, ailə dəyərlərinə önəm verən nümunəvi ailələri cəmiyyətə tanıtmaq və bu istiqamətdə təşviqat işini aparmaq məqsədi daşıyan “Ailələrimizi tanıyaq” layihəsi uğurla davam edir. Layihəmizin növbəti qonağı Sabirabad rayonundan olan, ziyalı və nümunəvi həyat tərzi ilə seçilən Məhərrəmovlar ailəsidir. Sevil Məhərrəmova 25 mart 1951-ci ildə Sabirabad rayonunda doğulub, Azərbaycan Dövlət Pedaqoji Universitetinin rus dili və ədəbiyyatı ixtisasını bitirib. 1974-cü ildən Sabirabad rayonu Qalağayın kənd tam orta məktəbində rus dili müəllimi kimi çalışıb. Hazırda təqaüddədir. Həyat yoldaşı Səmid Məhərrəmov 1946-ci ildə Sabirabad rayonunda anadan olub. Bakı Neft-Energetika Texnikumunu bitirib və energetika müfəttişi olaraq çalışıb. 1991-ci ildə vəfat edib. Məhərrəmovlar ailəsinin 4 övladı (3 qız və 1 oğlan) və 7 nəvəsi var. Övladlarının hər biri ali təhsillidir və bu gün müxtəlif sahələrdə uğurla fəaliyyət göstərir, qazandıqları bilik və təcrübələrlə cəmiyyətin inkişafına töhfə verirlər. Həyatını gənc nəslin təlim və tərbiyəsinə həsr etmiş, nümunəvi ömür yolu olan Sevil Məhərrəmovanın dəyərli fikirlərini sizlərə təqdim edirik. Sevil xanım xoşbəxt evliliyin sirrinin qarşılıqlı hörmət, səbir və anlayış olduğunu bildirib: “Hər iki tərəf bir-birini dinləməyi və dəstəkləməyi bacarmalıdır. Çətin anlarda birlikdə qərar vermək münasibətləri daha da möhkəmləndirir. Sevgi və səmimiyyət isə bu bağın əsasını təşkil edir. Ailə daxilində anlaşılmazlıq olduqda sakit şəkildə danışmağa üstünlük veririk. Hər kəs öz fikrini sərbəst ifadə edir və qarşı tərəfi dinləməyə çalışır. Əsas məqsəd problemi böyütmək yox, həll etməkdir”.Uşaqların tərbiyəsi ilə bağlı: “Vətənə layiqli övlad yetişdirmək üçün ilk növbədə düzgün tərbiyə və mənəvi dəyərlər vacibdir. Uşaqlara vətənpərvərlik, dürüstlük və zəhmətkeşlik aşılanmalıdır. Onların təhsilinə və inkişafına daim diqqət yetirilməlidir. Valideyn nümunəsi isə bu yolda ən güclü təsirdir. Ailəmizdə valideyn-övlad münasibətləri qarşılıqlı hörmət üzərində qurulub. Uşaqların fikirləri nəzərə alınır və onlarla açıq ünsiyyət saxlanılır. Eyni zamanda, qaydalar və məsuliyyət hissi də aşılanır. Sevgi ilə yanaşı, intizam da qorunur”. Ailə qurmaq istəyən gənclərə tövsiyəsi: “Gənclərə bir-birini yaxşı tanımağı tövsiyə edərdim. Qərar vermədən əvvəl ortaq dəyərlərin uyğunluğunu nəzərə almaq vacibdir. Maddi deyil, mənəvi uyğunluq daha önəmlidir. Qarşılıqlı hörmət və səbir ailənin təməlidir. Birlikdə vaxt keçirmək və ortaq məqsədlər müəyyənləşdirmək ailəni möhkəmləndirir. Hər iki tərəf ailənin davamlılığı üçün məsuliyyət hiss etməlidir”. Hörmətli Məhərrəmovlar ailəsinə dəyərli fikirlərini bizimlə bölüşdüyünə görə təşəkkürümüzü bildirir, onlara uzun ömür və möhkəm cansağlığı arzu edirik.
Qadınların Statusu üzrə Komissiyanın 70-ci sessiyası çərçivəsində “Qarşılıqlı Fəaliyyət və Etimad Tədbirləri üzrə Müşavirə ölkələri üzrə qadınların gücləndirilməsi” mövzusunda tədbir keçirilib
Azərbaycan Respublikasının BMT yanında Daimi Nümayəndəliyi və Ailə, Qadın və Uşaq Problemləri üzrə Dövlət Komitəsi tərəfindən, Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Katibliyinin dəstəyi ilə yan tədbir təşkil olunub. BMT-nin Baş Qərargahında Qadınların Statusu üzrə Komissiyanın 70-ci sessiyası çərçivəsində “Qarşılıqlı Fəaliyyət və Etimad Tədbirləri üzrə Müşavirə ölkələri üzrə qadınların gücləndirilməsi” mövzusunda keçirilən tədbirin məqsədi AQEM regionunda qadınların səlahiyyətlərinin artırılması, onların qərarqəbuletmə proseslərində iştirakının genişləndirilməsi və bu sahədə dövlətlər arasında daha sistemli və davamlı əməkdaşlıq mexanizmlərinin formalaşdırılması məsələlərini müzakirə etmək olub. Panel müzakirəsində çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, qadınların idarəetmə və qərarqəbuletmə proseslərində geniş təmsil olunması regional sabitlik və davamlı inkişaf üçün vacibdir. Qadınların siyasi, iqtisadi və sosial həyatda fəal iştirakı yalnız gender bərabərliyi deyil, həm də inkişaf və təhlükəsizlik məsələsidir. Komitə sədri qızların təhsil hüququnun qorunması, erkən evlilik hallarının qarşısının alınması, qadınların hüquqi maarifləndirilməsi və iqtisadi imkanlara çıxışının genişləndirilməsinin əsas prioritetlərdən olduğunu vurğulayıb. B.Muradova onu da bildirib ki, Azərbaycanın təşəbbüsü ilə AQEM çərçivəsində Qadınlar Şurası yaradılıb və onun ilk iclasının 14 aprel 2026-cı ildə Bakıda keçirilməsi planlaşdırılır. Panel müzakirəsində AQEM baş katibinin müavini Zhang Ling, Türkiyə Böyük Millət Məclisinin deputatı və Qadın və Kişilər üçün Bərabər İmkanlar Komitəsinin sədri Çiğdem Erdoğan, Qırğızıstanın BMT yanında daimi nümayəndəsi Aida Kasymalieva və BMT Qadınlar Təşkilatının Sülh və Təhlükəsizlik bölməsinin rəhbəri Paivi Kannisto da çıxış ediblər. Çıxışçılar qadınların gücləndirilməsi mövzusunda belə mühüm müzakirə platformasının təşkilinə görə Azərbaycana təşəkkürlərini bildirərək, bu təşəbbüsün AQEM məkanında əməkdaşlığın genişlənməsinə və qadınların qərarqəbuletmə proseslərində iştirakının artırılmasına töhfə verəcəyini vurğulayıblar. Qeyd edək ki, tədbir Azərbaycanın BMT yanında Daimi Nümayəndəliyinin müşaviri Nahidə Bağırovanın moderatorluğu ilə baş tutub və iştirakçıların sual-cavab sessiyası ilə yekunlaşıb.
BMT-də “Qadınlara və qızlara qarşı zorakılıqla mübarizə” mövzusu müzakirə edilib
BMT-nin Qadınların Statusu üzrə Komissiyasının sessiyası çərçivəsində keçirilən tədbirdə çıxış edən Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva qadınlara və qızlara qarşı zorakılığın qarşısının alınmasının insan hüquqlarının, ədalətin və bərabərliyin təmin olunması baxımından mühüm əhəmiyyət daşıdığını bildirib. Çıxışda qeyd olunub ki, Azərbaycanda məişət zorakılığı ilə mübarizə sahəsində qanunvericilik və institusional mexanizmlər ardıcıl şəkildə gücləndirilir. 2024-cü ildə “Məişət zorakılığının qarşısının alınması haqqında” qanuna edilən dəyişikliklər nəticəsində qanunun əhatə dairəsi genişləndirilib, mühafizə orderlərinin verilməsi prosedurları təkmilləşdirilib və qanunun təkrar pozulması inzibati xəta kimi müəyyən edilib. Eyni zamanda zərərçəkmiş şəxslərə dəstəyin gücləndirilməsi məqsədilə yeni idarələrarası koordinasiya mexanizminin yaradıldığı, müdafiə və dəstək xidmətlərinin genişləndirildiyi bildirilib. Ceyran Rəhmətullayeva vurğulayıb ki, zorakılığın qarşısının alınmasında gender bərabərliyi dəyərlərinin təşviqi, qadınların iqtisadi müstəqilliyinin gücləndirilməsi və cəmiyyətdə zorakılığa qarşı sıfır tolerantlıq prinsipinin formalaşdırılması mühüm əhəmiyyət kəsb edir.
Regionlarda icma ilə birgə fəaliyyətin gücləndirilməsi istiqamətində tədbirlər davam etdirilir
Ailə, Qadın və Uşaq Problemləri üzrə Dövlət Komitəsinin tabeliyində olan Uşaq və Ailələrə Dəstək Mərkəzləri icma ilə əlaqələrin gücləndirilməsi məqsədilə cari ilin yanvar-fevral aylarında kənd və qəsəbələrdə 451 nəfərin iştirakı ilə 50 icma görüşü təşkil edib. İcma görüşləri həssas kateqoriyadan olan ailələrin, qadın və uşaqların aşkar edilməsi, onların hüquqlarının müdafiəsi və profilaktik tədbirlərin görülməsində, icmanın imkanlarının səfərbər edilməsində mühüm rol oynayır. İcma sakinləri, kəndlərin icra, bələdiyyə və dini icmasının nümayəndələri, tibb məntəqələrinin işçiləri, təhsil müəssisələrinin tərbiyəçiləri, psixoloq və pedaqoqlarının iştirakı ilə keçirilən görüşlərdə ailə, qadın və uşaq hüquqları ilə bağlı qanunvericilikdən irəli gələn məsələlər diqqətə çatdırılır, icmanın ehtiyaclarına uyğun mövzular üzrə müzakirələr aparılır, həmçinin vətəndaşların müraciətləri qeydə alınaraq həlli istiqamətində tədbirlər görülür.