Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
IV “Uşaq Kitab Festivalı”nın açılış mərasimi keçirilib
10 aprel 2025-ci il tarixində Ailə, Qadın və Uşaq Problemləri üzrə Dövlət Komitəsi, Gənclər və İdman Nazirliyi, Mədəniyyət Nazirliyi və “Azərbaycan Nəşriyyatları Assosiasiyası” İctimai Birliyinin (ANAİB) təşkilatçılığı ilə IV “Uşaq Kitab Festivalı” keçirilir. Festival Azərbaycan Respublikasının Dövlət Himninin səsləndirilməsi ilə başlayıb. Daha sonra Vətən uğrunda şəhid olanların xatirəsi bir dəqiqəlik sükutla yad edilib. Açılış nitqi ilə çıxış edən ANAİB-in sədri Şəmil Sadiq iştirakçıları salamlayıb. Ötən 4 il müddətində Azərbaycan uşaq nəşriyyatçılığının inkişafından bəhs edən Şəmil Sadiq, hazırda nəşriyyatlar tərəfindən Festivala marağın daha da artdığını bildirib, Festivalda uşaqların aktiv iştirakının sevindirici hal olduğunu qeyd edib. O, uşaqlarda çevik zəkanın formalaşmasında, onların dünyagörüşünün artmasında, zehni inkişafının gücləndirməsində kitabın əhəmiyyətindən danışıb. Çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova, festival iştirakçılarını, xüsusilə də uşaqları salamlayaraq, festivalın işinə uğurlar arzu edib. Azərbaycan xalqının qədim tarixinin, şərəfli keçmişinin olduğunu xatırladan sədr, bu gün Zəfərdən doğan Azərbaycan və onun daha möhtəşəm, parlaq bir gələcəyinin olduğunu deyib: “Bu gələcək bu gün ailələrimizdə, sabaha inamımız olan övladlarımızın timsalında yetişir. Zəfərin uşaqları yeni qələbələrə köklənirlər”. Mütaliəni, kitabı uşaqlara sevdirən festivalın əhəmiyyətindən danışan B.Muradova, belə tədbirlərin davamlı olması üçün atılan addımları yüksək qiymətləndirib və təşkilatçılara təşəkkürünü çatdırıb. “Kitab müəlliflərinin, nəşriyyatların və mətbəələrin belə tədbirləri təşkil etməsi qurumlararası əməkdaşlığa yüksək töhfə verir. Bununla biz təhsil müəssisələri, ailələr və cəmiyyət arasında qırılmaz tellərlə əlaqə yaratmış oluruq” - deyə o əlavə edib. İnsanın yaratdıqları içində kitabı ən dəyərli, ona ən yaxın varlıq adlandıran B. Muradova, ona sadiqliyin həm də özünə və dəyərlərinə sadiqlik olduğunu söyləyib. Uşaq kitablarının məzmunu məsələsinə toxunan sədr, onlara hansı dəyərləri və bilikləri aşıladığımıza, hazırlanan kitabların onların yaşına və psixologiyasına uyğunluğuna diqqət etməyin vacibliyindən danışıb. Bildirib ki, uşaqların informasiya ilə təmasının daha erkən yaşda başladığını nəzərə alaraq, informasiyanın onun psixologiyasına təsiri məsələlərinə daha çox əhəmiyyət verilməlidir. Milli Məclisin deputatı Elnarə Akimova çıxış edərək bildirib ki, artıq on ildir ölkədə ənənəvi olaraq kitab festivalı keçirilir. Çıxışında mütaliənin hər kəs üçün bir yaşam tərzinə çevrilməsinin vacibliyini qeyd edən deputat, festivalların bu baxımdan xüsusi əhəmiyyətli olduğunu vurğulayıb. O qeyd edib ki, artıq dördüncüsü təşkil olunan Uşaq Kitab Festivalı da məhz uşaqların inkişafına və maariflənməsinə hədəflənən ideyadır. Festival çərçivəsində uşaqlar həm kitablarla ünsiyyətdə olur, həm yazıçılarla görüşür, həm də kitabı bir əyləncə ruhunda qəbul edirlər. Son illər uşaqlar üçün kitab qapaqlarının üzərində yaş məhdudiyyətlərinin qeyd edildiyini bildirən E.Akimova, bu yaş sərhəddinin çox vacib olduğunu bildirib. Çıxış edən Milli Məclisin deputatı Mehriban Vəliyeva, ənənə halını alan Uşaq Kitab Festivalının davamlı olmasının sevindirici hal olduğunu qeyd edərək, 4 gün ərzində uşaqların kitablarla birlikdə maraqlı və gözəl bayram keçirəcəklərini vurğulayıb. O bildirib ki, festivalın ən önəmli tərəflərdən biri də uşaqlarda kitab almaq mədəniyyətini formalaşdıran bir element kimi kitab daxıllarının olmasıdır. Bununla da məktəblilər kiçik bir vəsaitlə belə kitab almağın mümkün olduğunu öyrənirlər. M. Vəliyeva, valideynlərə müraciət edərək, onları evdə kitab oxumaqla övladları üçün nümunə rolunu oynamağa çağırıb. Sosial medianın uşaqların prioritetinə çevrildiyi bir zamanda həm valideynlərin, həm də uşaqlara kitabı sevdirən bu cür kitab festivallarının rolundan bəhs edib. Festival uşaqların ifasında müsiqilərin səsləndirilməsi ilə davam edib. Qeyd edək ki, 4 gün davam edəcək Festival çərçivəsində hər gün minlərlə uşaq kitabının endirimli qiymətlərlə satışı, tanınmış ədiblərin təqdimat mərasimləri, imza günləri, əyləncəli kukla tamaşaları nümayiş etdiriləcək. Həmçinin festivalda uşaqlar üçün intellektual master-klasslar, əyləncəli müsabiqələr, oxu saatları və səhnəciklər təşkil ediləcək.
Erkən evlilik və qohum evliliklərinin mənfi nəticələrinə dair növbəti görüş keçirilib
Ailə, Qadın və Uşaq Problemləri üzrə Dövlət Komitəsi tərəfindən Elm və Təhsil Nazirliyinin dəstəyi ilə təhsil müəssisələrində yeniyetmə və gənclərin müxtəlif mövzular ətrafında məlumatlandırılması istiqamətində görüşlərin davamı olaraq 10 aprel 2025-ci il tarixində Azərbaycan Dövlət İqtisad Universitetinin nəzdində Azərbaycan Maliyyə-İqtisad Kollecinin tələbələri ilə erkən evlilik və qohum evliliklərinin mənfi nəticələri mövzusundagörüş keçirilib. Görüşdə Dövlət Komitəsinin Ailə məsələləri şöbəsi müdirinin müavini Kamila Əliyeva mövzu ətrafında danışaraq, belə evliliklərin səbəbləri, törətdiyi mənfi nəticələri, onların qarşısının alınmasına dair dövlət, o cümlədən Ailə, Qadın və Uşaq Problemləri üzrə Dövlət Komitəsi tərəfindən görülən işlər, qanunvericiliyə edilən son dəyişikliklər barədə iştirakçılara ətraflı məlumat verib. K.Əliyeva yanlış stereotiplər əsasında yaranan erkən və qohum evlilikləri ilə mübarizədəbütün cəmiyyət üzvlərinin, yeniyetmə və gənclərin fəal olmalarının vacibliyini vurğulayıb. Sonra Maliyyə-İqtisad Kollecinin Təlim-tərbiyə işləri üzrə direktor müavini Murad Muradov tələbələrə öz tövsiyələrini verib. Sonda iştirakçıları maraqlandıran suallar cavablandırılıb.
“Güclü cəmiyyətin zərif simaları” layihəsi çərçivəsində İmişli rayonunda görüş keçirilib
Ailə, Qadın və Uşaq Problemləri üzrə Dövlət Komitəsi və “Regional İnkişaf” İctimai Birliyinin təşkilatçılığı ilə davam edən layihənin məqsədi regionlarda yaşayan qadınların, yeniyetmə və gənc qızların şəxsi və liderlik bacarıqlarının inkişafına dəstək vermək, ictimai fəallığını təşviq etmək, eləcə də gənc qızların rəqəmsal bacarıqlarının artırılmasıdır. 10 aprel 2025-ci il tarixində baş tutan görüşdə İmişli Rayon İcra Hakimiyyəti Aparatının İctimai-siyasi və humanitar məsələlər şöbəsinin müdir müavini Rüfət Muradov, Ailə, Qadın və Uşaq Problemləri üzrə Dövlət Komitəsinin Qadın və gender məsələləri şöbəsinin baş məsləhətçisi Aytəkin Quliyeva, Regional İnkişaf İctimai Birliyinin Beynəlxalq tərəfdaşlarla əməkdaşlıq şöbəsinin müdiri Gülbağda Leysanova çıxış edib. Qeyd edilib ki, layihə qadın hüquqlarının təşviqi və gender bərabərliyinin təmin olunmasına töhfə verməyi hədəfləyir. Bu istiqamətdə görülən işlər qadınların və qızların sosial, iqtisadi və texnoloji imkanlardan bərabər şəkildə yararlanmasına şərait yaradacaqdır. Görüşdə Elm və Təhsil Nazirliyində Strateji planlaşdırma və təhlil şöbəsinin müdiri, AFFA icraiyyə komitəsinin üzvü, 2019-cu il “Yüksəliş” Müsabiqəsinin qalibi Leyla Xəlilova-Rzazadənin və “Lunchef Catering” MMC və “Hİ Events” Azerbaijan şirkətlərinin təsisçisi Nilufər Qaranın TEDx formatında çıxışları dinlənilib. Sonda fikir mübadiləsi aparılıb.
Bahar Muradova “Müasir idarəçilər" klubunun üzvləri ilə görüşüb
8 aprel 2025-ci il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycan Respublikasının Prezidenti yanında Dövlət İdarəçilik Akademiyasının (DİA) İnzibati idarəetmə fakültəsinin nəzdində fəaliyyət göstərən “Müasir idarəçilər" klubunun üzvləri ilə görüşüb. Görüş zamanı “Dövlət idarəçiliyində ailə, qadın və uşaq siyasəti" mövzusu müzakirə edilib, qadınların cəmiyyətdə və dövlət idarəçiliyində rolu, onların hüquqlarının qorunması və gender bərabərliyinin təmin olunması ilə bağlı fikir mübadiləsi aparılıb. Tələbələrə Komitənin tarixi, eləcə də fəaliyyət istiqamətlərindən bəhs edilib. Komitənin ailə, qadın və uşaq hüquqlarının təmin olunması sahəsində qurumlararası fəaliyyəti əlaqələndirən, siyasəti müəyyənləşdirən, eləcə də yeni qanunverici təşəbbüsləri reallaşdıran dövlət orqanı olduğu, eyni zamanda BMT-nin iki komitəsində dövlət hesabatı ilə çıxış etdiyi diqqətə çatdırılıb. Dövlət Komitəsinin sədri Bahar Muradova görüş təşəbbüsünə görə tələbələrə təşəkkürünü bildirib, ictimai-siyasi sahələrin elmi-nəzəri inkişafına böyük töhfələr vermiş alimlərdən dərs aldıqları üçün şanslı olduqlarını deyib: “Siz Akademiyada təhsil almaqla Azərbaycanın ictimai-siyasi tarixi, bu günü və gələcəyinə aparan siyasi istiqamətlər barədə doğru və dəyərli bilgilər əldə etmək imkanı qazanırsınız”. Komitə sədri Azərbaycanda bu gün həm tarixi ənənələri, həm də müstəqilliyinin bərpa olunduğu qısa zaman ərzində əldə etdiyi nailiyyətlər sayəsində yeni bir siyasi təfəkkürün formalaşdığını bildirib. Ölkənin müstəqillik əldə etdiyi ilk illərə nəzər salan sədr, Ulu öndər Heydər Əliyevin liderliyi ilə müxtəlif siyasi baxışları olan insanların onun irəli sürdüyü milli ideologiya, yeni azərbaycançılıq məfkurəsinə əsaslanan bir sistem, siyasi konsepsiya ətrafında cəmlənə bildiklərini vurğulayıb. O, Ümummilli lider Heydər Əliyevin yeni dünya nizamını formalaşdırmağa qadir, eləcə də müasir dəyərlərə açıq, milli kimliyə və dəyərlərə sadiq dünya lideri olduğunu qeyd edib. B.Muradova əlavə edib ki, Ulu öndər yazılı ədəbiyyatımızı, tarixi irsimizi və ümumilikdə milli-mənəvi sərvətlərimizi sistemli ideoloji düşüncəyə və siyasi konsepsiyaya, cəmiyyətin həyat tərzinə və dövlətçilik sütunlarına çevirməyi bacaran nadir şəxsiyyətlərdən idi. Ulu öndərin müəyyənləşdirdiyi siyasi xəttin bu gün də Prezident İlham Əliyev tərəfindən uğurla davam etdirildiyini bildirən sədr, onları dünya siyasətinin uğur xəzinəsində öz parlaq izlərini buraxmış şəxsiyyətlər adlandırıb. Qarşıdakı onilliklərdə də bu siyasətin Azərbaycanın inkişafını təmin edəcəyinə inamını ifadə edib. B.Muradova görüş iştirakçılarına siyasi fəaliyyəti, idarəçilik təcrübəsi haqqında, həmçinin Komitənin fəaliyyət istiqamətlərindən danışıb. Dövlət siyasətində ailə institutunun gücləndirilməsi və uşaq hüquqlarının qorunması istiqamətində həyata keçirilən tədbirlər, proqramlar və gələcək strategiyalar barədə geniş məlumat verib. “Müasir idarəçilər" klubunun yaranma tarixçəsindən bəhs edən klubun yaradıcısı, DİA-nın İnzibati idarəetmə fakültəsinin dekanı dosent Elnur Əliyev, klubun başlıca məqsədinin Heydər Əliyev dövlət idarəçilik irsini araşdırmaq, öyrənmək və təbliğ etmək olduğunu deyib. Dövlət qurumları rəhbərlərinin tələbələrlə ilk görüşünün Komitədə keçirildiyin qeyd edən dekan, belə görüşlərin uğurlu təcrübə mübadiləsinə xidmət etdiyini bildirib. İştirakçılar açıq müzakirə və sual-cavab sessiyası zamanı mövzu ilə bağlı fikirlərini ifadə edərək, suallar ünvanlayıblar. Daha sonra onlar struktur bölmələrin fəaliyyəti ilə yaxından tanış olublar. Qeyd edək ki, görüşün məqsədi gənclərin ailə, qadın və uşaq siyasəti barədə məlumatlılığını artırmaq, dövlət idarəçiliyində bu sahədə aparılan işlər və siyasət mexanizmləri haqqında müzakirə aparmaq və gənclərin dövlət qurumları ilə əməkdaşlıq imkanlarını genişləndirməkdir.
Gənclərlə ailə dəyərlərinə həsr olunmuş görüş keçirilib
8 aprel 2025-ci il tarixində Ailə, Qadın və Uşaq Problemləri üzrə Dövlət Komitəsinin Elm və Təhsil Nazirliyi ilə əməkdaşlığı çərçivəsində tələbələrlə “Gənclərin ailə həyatına hazırlığı, erkən evlilik və qohum evliliklərinin fəsadları” mövzusunda görüş keçirilib. Görüş Azərbaycan Dillər Universitetində “Sağlam gələcək sağlam gəncliklə gələcək” şüarı ilə baş tutub. Görüşü giriş sözü ilə Universitetin Beynəlxalq münasibətlər və regionşünaslıq fakültəsinin dekanı, tarix elmləri doktoru, professor İbrahim Kazımbəyli açıb. Daha sonra Dövlət Komitəsinin Ailə məsələləri şöbəsinin baş məsləhətçisi Rafiq Mahmudov, Səhiyyə Nazirliyi 2 nömrəli Klinik Psixiatriya Xəstəxanasının klinik psixoloqu, psixoterapevt Rövşən Nəcəfov, Psixologiya Elmi Tədqiqat İnstitutunun təlimçi-psixoloqu, 10 nömrəli sanatoriya tipli internet məktəbinin psixoloqu Lətafət Novruzova çıxış ediblər. Çıxışlar zamanı dövlət ailə siyasəti, ailə və nikah institutu, gənclərin ailə həyatına hazırlığı, erkən evliliklərin və qohum evliliklərinin fəsadları, gənclərin müsbət psixoloji durumunun əhəmiyyəti, uyğun və düzgün həyat yolunun seçilməsi prinsipləri barədə məlumatlar verilib. Görüşdə Dövlət Komitəsi tərəfindən hazırlanan “Genofondumuzu qoruyaq”, “Uşaqlarımızın xoşbəxt gələcəyi üçün erkən evliliyə YOX deyək!” və “Ailəmiz - ən dəyərli xəzinəmizdir” adlı sosial çarxlar nümayiş olunub.
Dövlət Komitəsi yanında İctimai şuraya seçkilərin vaxtı müəyyən olunub
7 aprel 2025-ci il tarixində Ailə, Qadın və Uşaq Problemləri üzrə Dövlət Komitəsi yanında İctimai şuraya seçkinin təşkili məqsədi ilə yaradılan Seçki komissiyasının iclası keçirilib. İclasda İctimai şuraya seçkilərin təşkili, şuranın üzvlərinin say həddinin müəyyən edilməsi və seçki gününün təyin edilməsi məsələləri müzakirə edilib. Dövlət Komitəsinin aparat rəhbəri, Seçki komissiyasının sədri Ceyran Rəhmətullayeva Komissiya üzvlərini salamlayaraq, gündəlikdə duran məsələləri diqqətə çatdırıb. Bildirilib ki, 7 fevral - 19 mart 2025-ci il tarixlərində Ailə, Qadın və Uşaq Problemləri üzrə Dövlət Komitəsi yanında İctimai Şuraya namizədlərin qeydiyyatı elan edilib və ictimai fəallar tərəfindən müraciətlər daxil olub. Sənədlər yoxlanılaraq qəbul olunub və Seçki komissiyasının üzvlərinə təqdim edilib. Daha sonra Komissiya üzvləri çıxış edərək, şuraya seçkilərin keçirilməsi ilə bağlı rəy və təkliflərini səsləndiriblər. Yekunda Seçki komissiyasının Protokolu hazırlanıb. Protokola əsasən, şuranın üzvlərinin say həddi 7 nəfərdən ibarət tərkibdə müəyyən edilib. İclas zamanı İctimai şuraya seçki gününün 24 aprel 2025-ci il tarixinə təyin edilməsi qərara alınıb. Qeyd edək ki, seçkidə iştirak etmək üçün müraciət edən 15 nəfərin namizədliyi təsdiq edilib. Dövlət Komitəsi yanında İctimai Şuranın yeni tərkibinin formalaşdırılması üçün namizədlərin siyahısı Səsvermədə təmsilçilərinin iştirak etməsini istəyən vətəndaş cəmiyyəti institutları həmin şəxslər barədə aşağıdakı sənədləri göstərməklə müraciət edə bilərlər: - səsvermədə iştirak edəcək nümayəndənin şəxsiyyət vəsiqəsinin surəti; - vətəndaş cəmiyyəti institutunu təmsil etdiyini təsdiq edən sənədin surəti; - təmsil etdiyi vətəndaş cəmiyyəti institunun dövlət qeydiyyatı ilə bağlı sənədin surəti; - səsvermədə iştirak edəcək nümayəndənin əlaqə vasitəsi. Birgə yığıncaqda (səsvermə) iştirak etmək istəyənlər qeyd olunan sənədləri 2025-ci il 8 aprel- 23 aprel tarixləri arasında (iş günləri saat 10.00-dan 17.00-dək) Dövlət Komitəsinə şəxsən təqdim edə və ya elektron poçt ünvanına (ictimaishura@family.gov.az) göndərə bilər. Səsvermədə hər bir vətəndaş cəmiyyəti institutundan bir nümayəndə iştirak edə bilər. Ailə, Qadın və Uşaq Problemləri üzrə Dövlət Komitəsi yanında İctimai Şuraya seçki ilə bağlı səsvermə 24 aprel 2025-ci il tarixində saat 10:00-dan – 16:00-dək Bakı Biznes Mərkəzində (Ünvan: Neftçilər prospekti, 44) keçiriləcək.
Dövlət Komitəsinin sədri Bahar Muradova “Ailəm könüllüləri” ilə görüşüb
4 aprel 2025-ci il tarixində keçirilən görüşdə “Ailəm könüllüləri” proqramı çərçivəsində könüllülük fəaliyyətini uğurla başa vuranlarla yanaşı, proqrama yeni qoşulan gənclər də iştirak edib. Komitə sədri Bahar Muradova gəncləri salamlayaraq, Azərbaycanda könüllülük hərəkatının geniş miqyas aldığını və həyatımızın bir parçasına çevrildiyini qeyd edib. O, yaradılmış imkanlardan vaxtında və bacarıqla istifadə etməyin üstünlük qazandırdığını, bütün fəaliyyətlərin insanın gələcək arzu və istəklərinə töhfə verməli olduğunu vurğulayaraq, gənclərin müxtəlif sahələrdə fəallığını müsbət hal kimi qiymətləndirib. Komitə sədri, əsas hərəkətverici qüvvə kimi gənclərin öz ideyalarını reallaşdırmaq, eləcə də cəmiyyətə töhfələr vermək üçün daha enerjili, həvəsli olduqlarını, bütün proseslərdə aktiv iştirak etdiklərini, bilik və bacarıqlarını təkmilləşdirmək üçün öz üzərilərində daim çalışdıqlarını vurğulayıb. B. Muradova, Komitənin könüllülük proqramında iştirak edən gəncləri sosial iş və psixologiya kimi məsuliyyətli sahədəki fəaliyyətləri ilə ölkədə insan kapitalının formalaşmasına töhfə verəcəklərinə inamını ifadə edib: “Çünki bütün sərvətlər içində ən qiymətlisi insan kapitalıdır. Nə etsək insan, onun rifahı və gələcəyi naminə edirik” deyə o fikirlərini yekunlaşdırıb. Daha sonra könüllülər təqdimatla çıxış edərək, 3 aylıq fəaliyyətləri dövründə iştirak etdikləri tədbirlər barədə geniş məlumat veriblər. Davamında Komitənin könüllülərlə iş üzrə məsul əməkdaşları Rafiq Mahmudov və Dəniz Vəliyeva, proqram çərçivəsində həyata keçirilən tədbirlər, eyni zamanda yeni qoşulmuş iştirakçılar barədə məruzə ilə çıxış ediblər. Müzakirələrlə davam edən görüşdə təəssüratlarını bölüşən könüllülər, nəzəri biliklərin təkmilləşdirilməsində, eləcə də təcrübi bacarıqların əldə olunmasında Dövlət Komitəsindəki könüllülük fəaliyyətinin xüsusi əhəmiyyət kəsb etdiyini vurğulayaraq, yaradılan şəraitə və dəstəyə görə təşəkkürlərini bildiriblər. Yekunda könüllülük fəaliyyətini uğurla başa vuran gənclər sertifikatla təltif olunub.
Regionlarda Beynəlxalq Uşaq Kitabı Günü ilə əlaqədar maarifləndirici tədbirlər keçirilib
Ailə, Qadın və Uşaq Problemləri üzrə Dövlət Komitəsinin Ağdam, Saatlı, Sabirabad, Hacıqabul, Qəbələ, İsmayıllı, Zərdab, Zaqatala, Goranboy, Göygöl Uşaq və Ailələrə Dəstək Mərkəzləri tərəfindən 1-4 aprel 2025-ci il tarixlərində təhsil müəssisələri, kitabxana və istirahət parklarında mərkəzlər və kitabxana əməkdaşları, Uşaq Səfirlər Məclisinin rayon üzrə nümayəndələri, məktəblilər, müəllimlərin iştirakı ilə 2 Aprel - Beynəlxalq Uşaq Kitabı Günü ilə əlaqədar maarifləndirici görüşlər və aksiyalar keçirilib. Tədbirlərdə çıxış edənlər kitabların faydası, mütaliənin əhəmiyyətindən danışıblar. Qeyd edilib ki, Beynəlxalq Uşaq Kitabı Günü uşaqları oxumağa təşviq etməklə yanaşı, həm də cəmiyyətin gələcəyini formalaşdıracaq gənc nəsillərə müsbət təsir göstərir. Tədbirlərdə uşaqların mütaliə etdikləri kitablar ətrafında fikir mübadiləsi aparılıb, balaca oxuculara kitab hədiyyə olunub.
Astarada vətəndaş qəbulu keçiriləcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 11 aprel 2025-ci il tarixində, saat 10:00-da Astara rayon Heydər Əliyev Mərkəzində vətəndaşları qəbul edəcək. Qəbulda Lənkəran şəhəri, Lerik və Astara rayon sakinlərinin müraciətlərinə baxılacaq.
